Foto: Pavlodar oblysy TJM baspasóz qyzmeti
Bala quqyqtary jónindegi ýákil Dinara Zákieva Ekibastuzdaǵy jeti jasar qyzdyń óliminen keiin málimdeme jasady. Balanyń ólimine kúdikti retinde anasy men onyń tanysy ustalǵan bolatyn, - dep habarlaidy Tengrinews.kz saity.
Zákievanyń aitýynsha, biyldyń ózinde elimizde 25 bala qaza bolǵan, onyń altaýy - jaqyn adamdarynyń qolynan.
"Búgin qaitys bolǵan jeti jasar qyz tabyldy. Qylmysqa kúdikti - balanyń anasy, aldyn ala málimetter boiynsha, moiyndaǵan. Osy otbasynyń basqa balalary balalardy qoldaý ortalyǵyna ornalastyrylady", - dep jazdy Zakieva Instagram-da.
Onyń aitýynsha, mundai qorqynyshty saldar aldynda kóbinese qiyn jaǵdai, esepke alý, alkogol, uryp-soǵýǵa bailanysty birqatar oqiǵa bolady.
"Tergeý is-sharalarynyń 70 paiyzynda bireý mindetti túrde birdeńe kórgeni jáne bilgeni, biraq habarlamaǵany, aralasqysy kelmegeni, qorqatyny jáne t.b. anyqtalady. Mundai qorqynyshty saldardyń, zorlyq-zombylyqtyń aldyn alýdyń bir joly - biz ben sizdiń aralasýymyz.
Eger balalarǵa qaýip tóndiretin jaǵdaidy kórseńiz, estigen bolsańyz, 111 nemese 102 nómirlerine qońyraý shalyńyz. Árine, aqparat tekseriledi, biraq eger qorqynysh rastalsa, onda bireýdiń ómirin saqtai alasyz", - dedi Zákieva.
Onyń aitýynsha, ekinshiden, Prezidenttiń tapsyrmasy boiynsha memlekettik organdarmen jáne depýtattarmen birlesip ázirlengen balalar qaýipsizdigi týraly zań jobasynda qarastyrylǵan zańnamalyq ózgerister óte mańyzdy.
Sonymen qatar, balalar ombýdsmeni kadrlardyń jetispeýshiligi týraly málimdedi.
"Zańdardy qabyldaý arqyly olardyń oryndalýyn qamtamasyz etýimiz kerek. Qazir 6,8 million balaǵa barlyǵy 303 qamqorshy qyzmetker, iaǵni bir qyzmetkerge 22 myń bala keledi. Al negizinde 5 myń balaǵa 1 qyzmetker qajet", - dedi Zákieva.
