Búgin Almaty qalasy ortalyqtandyrylǵan kitaphanalar júiesi A.Chehov atyndaǵy balalarǵa arnalǵan qalalyq ortalyq kitaphananyń uiymdastyrýymen, Abai Qunanbaiulynyń týǵan kúnine orai tikelei efir ótti, - dep habarlaidy «Ult aqparat».
Balalarǵa Abai shyǵarmashylyǵyn tanytý, Abai bolmysyn ashý, búginge jetken Abai beinesin tanystyrý maqsatynda uiymdastyrlǵan sharanyń jetekshisi kitaphana qyzmetkeri Ainur Muratqyzy bolsa, efir tizginin kitaphananyń turaqty oqyrmany, jas Abaitanýshy Aiym Altaiqyzy júrgizdi. Al efir qonaǵy - kino jáne teatr akteri Qazaqstannyń eńbek sińirgen qairatkeri, Qurmet ordeniniń iegeri Bolat Ábdilmanov.
Jas júrgizýshi áńgimeni «barlyǵymyz Abaidyń oqyrmanymyz, kórermenimiz. Al Abaidyń ózi bolý, sózi bolý qandai sezim? Jalpy Abaidyń bútin bolmysyn tanýda Abai beinesi desek kóz aldymyzǵa sizdiń beineńiz keledi. Abai úni desek, qulaǵymyzǵa sizdiń daýsyńyz keledi. Sondyqtan uly tulǵanyń obrazyn asha alǵan akter retinde alǵashqy suraǵymdy osy Abai róline qatysty qoiǵym kelip otyr. Eń alǵash ret Abai róline 30 jasyńyzda bekitilgen ekensiz. Sol kezdegi sezim, daiyndyq qalai boldy? Sol estelikpen bólisseńiz» degen suraqtan bastady.
Búgingi osyndai uly kúni tikelei efirge shaqyryp, uiymdastyryp otyrǵan kitaphana qyzmetkerlerine alǵyz bildirgen akter alǵashqy Abai rólin sonaý 90-jyldary oinap bastaǵanyn aitty.
«Biz poetikalyq spektaklderdiń atasy dep atalady, marqum bolyp ketti, memlekettik syilyqtyń laýreaty Raiymbek Seitmetov aǵamyz Abaidyń óleńderinen jáne qara sózderinen quralǵan «Qalyń elim, qazaǵym» degen poetikalyq spektakl qoiǵan. Sonda sol jerde aǵa Abai degen ról boldy, sony maǵan bergen edi. Sol eń alǵash 30 jasymda sol aǵa Abaidyń rólin oinadym. Ol kezde keremet daiyndyǵym boldy dep aita almaimyn. Endi Abaidy kádimgi ózderińiz siiaqty mektepte oqyp júrgenim bar, qara sózderin jattap júretinbiz. Sonda túsingenimshe sol Abaidaǵy alǵashqy baspaldaǵy boldy desem de bolady. Jalpy maǵan ol kezde kómektesken, árine, Raiymbek Seitmetov aǵamyzdyń kóp kómegi boldy. Jalpy teatrda kórermen jyly qabyldady. Onyń aldynda men shalt qimyldap, sondai batyrlardyń rólin oinap júretinmin. Jastardyń rólin oinap júretinmin. Al sol kezde aǵa Abaidyń rólin bergende kádimgidei qobaljyp, qinalyp, sondai alǵashqy sezim boldy», - dedi Bolat Ábdilmanov.
Sondai-aq, akter «Abai obrazy Bolat Ábdilmanovqa ne úiretti?» degen suraqqa tereńinen tolǵady. Onyń aitýynsha, Abai obrazynan kóp nárse úirengen.
«Jalpy, akterdi árbir ról tárbieleidi dep aitady. Shynynda da Abai róli jalpy izdenýge, eńbektenýge, sodan keiin ár ýaqytta óziniń shyqqan biigine sondai bir toqmeiilsimeý, bilgen saiyn bile tússem eken degen qushtarlyq, akter retindegi izdenister, Abaidyń óziniń óleńderin, qara sózderin oqý óte qiyn. Jalpy jas kezde qiyn. Onyń oralymy, onyń maǵynasy, onyń astary da tereńde jatyr, sony bilýge tyrystyq. Sodan keiin Abai rólinde Abai óziniń búkil filosofiiasynda, júrek, aqyl, qairat, bilim, barlyǵyn júrekke baǵyndyrady. Abai aitady, adam oilaidy miym oilap tur dep. Iá, mi oilaidy, biraq sheshim shyǵaratyn mi emes, júrek tarazysy deidi. Júrek osynyń bárin qalai tanyp, qalai sezinedi. Sodan keiin júrekpen jumys isteý, sezimmen jumys isteý, iaǵni júrekti taza ustaý. Taza ustaý degen ne? Abaidyń óz óleńinde bar: «Júrektiń kózi ashylsa, qyrattyń túser sáýlesi. Ishtegi kirdi qashyrsa, adamnyń hiqmet keýdesi» deidi. Adam balasy jaqsylyq jasaǵan saiyn júrek jumsarady. Júrek jumsarǵan saiyn imany kúsheiedi. Imany kúsheigen saiyn Allaǵa jaqyndaidy degen Abai. Sondyqtan da júrekti taza ustaý, ony kirletpeý, ol qai mamandyq úshin de kerek. Bizdiń Ázirbaijan Mámbetov degen aqsaqalymyz aitatyn, «júregi qatygez adamnyń sahnaǵa shyǵýǵa qaqysy joq» dep. Qazaqta maqal bar ǵoi, «jamannyń kegi basy jerge jetkenshe, jaqsynyń kegi shái oramal kepkenshe» deidi. Adam pende bolǵannan keiin bireýge ashýlanady, renjidi. Biraq sonyń bárin júrekke salynady. Arqańa salyp alyp, sonymen ómir súrýge bolmaidy. Qalai ókpelediń, solai umytý kerek. Sol adamnyń ornyna ózińdi qoiyp kórý kerek. Iaǵni sen bireýden jasaǵan qiianatyń úshin, kóńilin qaldyrǵanyń úshin keshirim surai alsań, onda sen durys joldasyń», dedi akter.
Esterińizge sala keteiik, Almaty qalasy ortalyqtandyrylǵan kitaphanalar júiesi A.Chehov atyndaǵy balalarǵa arnalǵan qalalyq ortalyq kitaphananyń uiymdastyrýymen, Abai Qunanbaiulynyń týǵan kúnine orai tikelei efir ótti. Balalarǵa Abai shyǵarmashylyǵyn tanytý, Abai bolmysyn ashý, búginge jetken Abai beinesin tanystyrý maqsatynda uiymdastyrlǵan sharanyń jetekshisi kitaphana qyzmetkeri Ainur Muratqyzy bolsa, efir tizginin kitaphananyń turaqty oqyrmany, jas Abaitanýshy Aiym Altaiqyzy júrgizdi. Al efir qonaǵy kino jáne teatr akteri Qazaqstannyń eńbek sińirgen qairatkeri, Qurmet ordeniniń iegeri Bolat Ábdilmanov.
