Parlament Májilisiniń jalpy otyrysynda depýtat Irina Ýnjakova elimizdegi mektepterdi inspektorlarmen qajetti deńgeide qamtamasyz etýdi surady. Osy oraida Úkimet basshysy Asqar Maminniń atyna Májilistegi «Nur Otan» fraktsiiasy atynan depýtattyq saýal joldady, dep habarlaidy QazAqparat.
Depýtat Tarazdaǵy mektepterdiń birinde oqýshy qyzǵa qatysty jasalǵan zorlyq-zombylyqqa toqtala kele, balalardyń mektep mekemelerinde tiisti deńgeidi qorǵalmaǵany problema ekenin atap ótti.
Sonymen qatar I. Ýnjakova búginde elimizdegi kóptegen mektepterde ájethanalar aýlada ornalasqanyn jetkizdi.
«Tarazdaǵy tragediia mekteptegi videobaqylaý júiesiniń tiimsizdigin kórsetti. Resmi jańalyqtarda atalǵan er adam monitorlarda bir saǵat boiy kórinip turǵany habarlandy. Alaida oǵan eshkim nazar aýdarmaǵan. Jalpy, bilim berý uiymdarynda balalardyń ómiri men qaýipsizdigine mektep mekemesinde jumys isteitin barlyq adam jaýapty, onyń ishinde mektep inspektorlary da bar», - dedi ol.
Osy oraida ol kóp jaǵdaida inspektorlar mektepte bolmaitynyn, olar kóbine keńester nemese basqa da sharalarda júretinin jetkizdi.
Mektep inspektorlary óz qyzmetinde uzaq turaqtamaitynyn aitqan I. Ýnjakova: «Olardyń jii aýysýy saldarynan balalar da, muǵalimder de mektep inspektorynyń túrin este saqtap úlgermeidi. Ishki ister ministrligi málimetinshe, qazirgi kezde mektep inspektorlarymen jasaqtalmaý deńgeii 2000 birlikti qurap otyr», - dedi.
Osy oraida depýtat atalǵan problemalardy eskere otyryp, keshendi ári júieli sharalardy qabyldaýdy usyndy.
Bul rette, barlyq mektepti ǵimarat ishindegi ájethanamen qamtamasyz etý, beine baqylaý júiesin integratsiialaý jumystaryn jedeldetý máselesi kóterildi. Sonymen qatar, mektep inspektorlarymen tolyqtai qamtamasyz etý, beitanys adamdardyń bilim berý mekemesiniń aýmaǵyna kirýin shekteý boiynsha qatań tártipti engizý usynysy aityldy.
Buǵan deiin Tarazdaǵy №6 mekteptiń 7-synyp oqýshysy bilim ordasynyń ájethanasynda zorlanǵany, kúdiktiniń qolǵa túskeni, oǵan jaýapty basshylardyń jumystan qýylǵany habarlanǵan bolatyn.
Oqiǵadan keiin Jambyl oblysynyń barlyq mektepterinde qaýipsizdik kúsheitildi.
