Tanymal saiasattanýshy, Eýropalyq quqyq pen adam quqyǵy saraptamalyq institýtynyń direktory Marat Bashimov respýblika mektepterindegi qaýipsizdikti qamtamasyz etýge qatysty pikirin bildirdi, dep habarlaidy QazAqparat.
Sarapshy Prezident Qasym-Jomart Toqaev bul máseleni birneshe ret kótergenin atap ótti.
«Búgin Úkimet otyrysynda bilim ministri balalardyń qaýipsizdigine qatysty qolǵa alynǵan negizgi jumystardy atady. Bul máseleni Memleket basshysy da birneshe ret kóterdi. Sheshimderge sáikes, balalardy qorǵaýǵa barlyq sala atsalysýy tiis. Bul jerde ministr balalardyń quqyqtaryn fizikalyq turǵydan qorǵaý týraly aitty. Qazan qalasyndaǵy tragediia qaitalanbaýy kerek. Fizikalyq nemese psihologiialyq qorǵanys ol mańyzdy emes, eń bastysy qaýipiń aldyn alý shart. Búginde barlyq qazaqstandyq mektepter balalardyń qaýipsizdigin qamtamasyz etýge daiyn emes ekenin moiyndaý kerek. Áli kúnge deiin qylmys kóp tirkeletin óńirler bar. Tehnikalyq máseleler sheshilmegen. Sondyqtan myna alasapyran zamanda balalardyń qaýipsizdigin baqylaý óte qajet», - dedi Marat Bashimov.
Onyń pikirinshe, balalardyń quqyqtyq saýattylyǵyn arttyrý jumystaryn uiymdastyrý mańyzdy.
«Aqparattyq ǵasyrda kámeletke tolmaǵandardy jeke tulǵa etip qalyptastyrýda ata-anadan basqa qoǵam men memleket belgili bir ról atqarady. Sebebi balalar olardy kóbirek tyńdaidy jáne qabyldaidy. Qalai isteý kerek, qaida barý qajet, kimge júgingen durys sol siiaqty. Biz bilim berý júiesinde qaýipsizdikti qamtamasyz etý úshin bar kúsh-jigerimizdi salýymyz kerek dep sanaimyn. Bul barlyq jerge beinekameralardy qoiýmen ǵana shektelmeýi tiis. Sonymen qatar, bizdiń balalar tárbiesine barynsha den qoiýymyz mańyzdy. Bul mektepke deiingi, orta jáne joǵary bilim alýdyń barlyq kezeńin qamtidy.
Marat Bashimov Ulttyq qoǵamdyq senim keńesiniń alańynda Prezident adam quqyǵyn qorǵaý salasynda birinshi kezekte turǵan halyqaralyq standarttardy engizý týraly únemi aitatynyn tilge tiek etti. Onda balalardy qorǵaý birinshi orynǵa shyǵady.
«Bizde jaqyn arada júzege asyrylatyn keshendi jospar bar. Onda balalardy qorǵaý birinshi kezekte tur. Sebebi biz BUU-nyń alty negizgi konventsiialarynyń ishinen balalar quqyǵy týraly konventsiiaǵa qol qoidyq. Sonymen qatar, Memleket basshysynyń adam quqyǵy kórsetkishterin teńestirý týraly talaby mańyzdy. Kórsetkishterdiń birinshisi - kámeletke tolmaǵandardyń qaýipsizdi», - dep atap ótti spiker.
Eske salaiyq, búgin Úkimet otyrysynda QR Premer-Ministri Asqar Mamin 10 shildege deiin «Bilim berý uiymdarynda balalardyń qaýipsizdigin qamtamasyz etý jónindegi jol kartasyn» bekitýdi tapsyrdy.
