Bolashaq jýrnalister arasynda «Úmit» shyǵarmashylyq baiqaýy ótkiziledi.
Bul týraly búgin media salasynyń mamandaryn daiyndaityn joǵary oqý oryndarynyń rektorlarymen kezdesken QR Aqparat jáne qoǵamdyq damý ministri Aida Balaeva aitty, dep habarlaidy QazAqparat.
«Sonymen qatar joǵary oqý oryndaryndaǵy jas mamandardy naqty sala, atap aitqanda, aýyl sharýashylyǵy, ekonomika, qarjy, meditsina, ekologiia salalary jáne basqa da baǵyttar boiynsha daiyndaý isine kóp syn aitylady. Bul oraida ministrlik media sala mamandaryn daiyndaý, qaita daiarlaý jáne biliktiligin arttyrý boiynsha arnaiy joba ázirlep otyr. Munan bólek bilim berý júiesiniń bilim berý deńgeii men tiimdiligin arttyrý úshin jyl saiyn stýdentter arasynda «Úmit» shyǵarmashylyq baiqaýyn ótkizý josparlanyp otyr», - dedi Aida Balaeva.
Onyń atap ótýinshe, media saýattylyq máselesi de búgingi kúnniń kókeitesti máselesine ainalǵan.
«Sebebi búgingi internet zamany, túrli áleýmettik jeliler kóptegen jalǵan aqparattyń, zerttelmegen taqyryptyń taralýyna sebep bolyp jatady. Osy oraida elimizdegi joǵarǵy oqý oryndarynda jýrnalistika fakýltetinde «media jáne aqparattyq saýattylyq» pánin engizýdi usynamyn. Baspasóz qoǵamnyń ainasy bolsa, jýrnalist sol qoǵamǵa aqparatty jetizetin tulǵa. Sondyqtan qoǵamnyń mádenietin kóterip, talǵamyn qalyptastyrý, saýatyn arttyrý tilshiler qaýymyna artylatyn senim men mindet desek artyq aitqanym emes. Osy oraida biz bir kelisimge kelip, oń nátijelerge qol jetkizýge, birge qyzmet etýge aldaǵy ýaqytta da daiyndyz», - dedi ministr.
