Elimizde 117 úkimettik emes uiym ǵana ekologiialyq baǵyt boiynsha jumys isteidi. Bul týraly ekologiialyq bilimge qatysty Facebook-tegi KUN.KZ ashyq media platformasynda ótken onlain konferentsiiada aityldy, dep habarlaidy QazAqparat.
«Búgingi konferentsiiada qozǵalatyn taqyryp óte ózekti. Ekologiia qazirgi tańda «soǵys», «apat» degen sózdermen qatar qoldanylyp kele jatqan uǵymǵa ainaldy. Óitkeni tabiǵat - tirshiliktiń kózi ǵana emes, ómirdiń ózi. Sol sebepti el Prezidenti Qasym-Jomart Kemeluly bul máselege erekshe kóńil bólip, oǵan qatysty árbir keleńsiz jaǵdai úshin jany aýyryp, el-jurtty ekologiialyq mádenietke, qorshaǵan ortany qurmetteýge, tabiǵatty aialaýǵa shaqyrdy. Osy úndeýdiń izin sýytpai bizdiń ministrlik jaqynda ǵana «Ekologiialyq saýattylyq» taqyrybynda tanymal ekologtardyń, bilikti sarapshylardyń qatysýymen dóńgelek ústel otyrysyn ótkizdi. Nátije biz kútkennen áldeqaida jaqsy boldy», - deidi Qazaqstan Respýblikasynyń Aqparat jáne qoǵamdyq damý ministri Aida Balaeva.
Onyń aitýynsha, ekologiia taqyryby qoǵam úshin ózekti másele bolyp qala bermek.
«Dóńgelek ústel otyrysyn ótkizgen kezde biz ekologiialyq tárbiege basymdyq berdik. Sonyń nátijesinde birneshe baǵyt boiynsha alda qalai jumys isteitinimizge bailanysty algoritm jasaldy. Birinshi baǵyt - ekologiia salasyna qatysty arnaiy jobalardy júzege asyrý. Búgingi tańda ekologiialyq máselelerdi sheshýge qatysty jumystarǵa qoǵamdyq uiymdar az tartylǵan. Osy baǵyt boiynsha jumys isteitin úkimettik emes uiymdar sany - 117 ǵana. Bul - málimetter bazasynda tirkelgen úkimettik emes uiymdardyń 3,3%-y ǵana», - deidi ol.
Al memlekettik áleýmettik tapsyrys aiasyndaǵy áleýmettik jobalar 2%-dan aspaidy.
«Áleýmettik jobalardyń jalpy sany 2044 bolsa, ekologiialyq baǵyttaǵy sany - 21 joba ǵana. Ortalyq memlekettik organdarda memlekettik áleýmettik tapsyrys aiasynda jumys isteitin bizdiń ministrlikten basqa ekologiialyq joba joq. Ekinshi baǵyt - biz Qoǵamdyq baqylaýdyń mehanizmin kúsheitýdi kózdep otyrmyz. Onyń quramynda qoǵam belsendileri ǵana emes, kásibi ekologtar da bar. Olar ekologiialyq aýditke qatysty másele boiynsha memleketke naqty kómek kórsete alady. Úshinshi baǵyt - ekologiia taqyryby boiynsha aqparattyq jumystardy jandandyrý. Bul jerde ekologiia salasyndaǵy jýrnalistikany damytýǵa basymdyq beriledi. Qorshaǵan ortany qorǵaý týraly elimizde kóp aitylyp, kóp jazylatyny sózsiz. Osy taqyrypqa qatysty beinerolik, baǵdarlama, filmder de bar. Biraq qorshaǵan ortany saqtap qalý, ár adam ol qajettilikti túisingende ǵana júzege asady. Mundai mádeniettiń bastaýy bilim men tárbiede jatyr», - deidi Aida Balaeva.
Onyń aitýynsha, qalada qoi men eshkini, shóp pen tikendi ajyrata almaityn bala kóp.
«Bul - ejelden tabiǵatpen birge ósip-ónip, ań-qustyń kiesin qurmettegen halyqtyń urpaǵy úshin - úlken syn. Ekobilimdi de, ekomádenietti de mektepten bastaý kerek», - deidi ol.
Eske sala ketsek, Prezident Qasym-Jomart Toqaev 10 shilde kúni Úkimettiń keńeitilgen otyrysynda mektep baǵdarlamasyna «Balalardyń ekologiialyq bilimi» atty jańa pán engizýdi tapsyrǵan bolatyn.
