Almaty qalalyq balalar klinikalyq aýrýhanasynyń gematologiia bóliminiń meńgerýshisi Uljalǵas Óskenbaeva Kavasaki sindromyn qalai anyqtaýǵa bolatynyn jáne osyndai sirek kezdesetin aýrýdyń alǵashqy belgilerinde ne isteý kerektigin aityp berdi, dep habarlaidy QazAqparat tilshisi.
Dárigerdiń sózinshe, COVID-19 uqsaityn aýrý kópjúieli qabyný sindromy dep atalady.
«Kavasaki sindromy sáýir aiynda paida boldy. Bul balalardyń immýndyq júiesiniń qabynýynan bolǵan. Kavasaki sindromy - bul tamyrǵa áser etetin júielik aýrý. Ásirese, ortasha jáne kishi diametrli arteriialarǵa áser etedi. Negizinde kavasaki sindromy kishkentai balalarda jii kezdesedi. Alaida arakidik eresekterde de baiqalady. Aýrýdyń etiologiiasy virýstar, genetikalyq beiimdilik jáne aýtoimmýndyq mehanizm. Desekte, bul aýrýdyń patogenezi tolyq zerttelmegen.
Onyń belgilerine keler bolsaq, dene qyzýynyń kóterilýi, jótel, qan qysymynyń tómendeýi, ishek aýrýy, aiaq-qol isinýi múmkin, tynys alý qiyndaidy, júrek soǵýy jiileidi»,– deidi Uljalǵas Óskenbaeva.
Sonymen qatar, ol ata-analardy josparly ekpelerden bas tartpaýǵa shaqyrdy.
«Balalardy túrli virýstyq infektsiiadan qorǵaýdyń senimdi joly – vaktsina. Kóptegen profilaktikalyq egýler virýstyq infektsiialardyń aldyn alýǵa baǵyttalǵan. Sondyqtan ata-analar balalaryn kúntizbege sáikes ekpe saldyrýy kerek»,– deidi dáriger.
Sóz arasynda dáriger emdeý tásilin de tilge tiek etti.
«Qazir dene salmaǵynyń ár kilogrammyna 2 gramm immýnoglobýlin salyp jatyrmyz. Sondai-aq, «Aspirin» qoldanylady. Eger baladan joǵaryda atalǵan aýrýdyń belgileri anyqtalyp, diagnoz qoiylatyn bolsa birden emdi bastaimyz. Bul asqynýlardyń aldyn alady. Barlyq jaǵdaida aýrýdyń onynshy kúnine deiin koronarlyq arteriialardyń qabynýyn jáne trombtardyń paida bolýyn boldyrmaý úshin jedel túrde emdeýdi bastaý qajet»,– dedi ol.
Dáriger balalardy adam kóp shoǵyrlanatyn jerge aparmaýǵa keńes berdi.
«Qazir adamdarmen qarym-qatynasty barynsha azaitý kerek. Eger adam kóp júretin jerge baryp jatsa mindetti túrde maska taǵyp, áleýmettik qashyqtyqty saqtaǵan durys. Odan bólek balany kópshilik oryndarda tamaqtandyrmai tura turǵan jón. Bastysy, balanyń immýnitetin kóterýge kúsh salý kerek. Durys tamaqtaný qajet», - deidi spiker.
