Qyzylordada balabaqsha tárbieshisiniń búldirshinderge dóreki qarym-qatynas jasaǵany beinelengen video áleýmettik jelilerde qyzý talqylanýda, dep habarlaidy ult.kz.
Kadrlarda tárbieshiniń balalardyń birine kúsh qoldanǵanǵa uqsas áreketteri baiqalady. Bul jaǵdai jeli qoldanýshylarynyń alańdaýshylyǵyn týdyryp, olar jaýapty organdardan tiisti shara qabyldaýdy talap etti.
Oqiǵaǵa qatysty Qyzylorda oblystyq Politsiia departamenti túsinikteme berdi.
Vedomstvonyń málimetinshe, kámeletke tolmaǵan balany tárbieleý jónindegi mindetterdi tiisinshe oryndamaý deregi boiynsha qylmystyq is qozǵalǵan.
Qazirgi ýaqytta qajetti tergeý áreketteri júrgizilip jatyr. Politsiia qyzmetkerleri beinejazbalardy zerttep, oqiǵanyń barlyq mán-jaiyn anyqtaýda.
Sondai-aq oblystyq Bilim basqarmasyna tiisti usynys joldanǵan.
