Balabaqshaǵa kezektiń biryńǵai bazasy qurylady. Bul jaiynda QR Oqý-aǵartý vitse-ministri Ǵani Beisembaev aitty, dep habarlaidy QazAqparat.
«Mektep jasyna deiingi balalar úshin josparlanǵan 34 myńnan astam oryndy qamtityn 322 balabaqsha ashylady, 9,4 myń orynǵa arnalǵan 130-y 5 aida ashylady. Jyl sońyna deiin 3-6 jastaǵy balalardy balabaqshalarmen qamtý 99,3 paiyzǵa deiin jetkizý belgilengen. Jekemenshik balabaqshalarda oryn alǵan keleńsizdikterge jol bermeý úshin qaýipsizdik sharalaryn kúsheitip, bilikti mamandarmen qamtamasyz etý, sondai-aq beinebaqylaý, jihazben jabdyqtaý talaptarynyń oryndalýyn qadaǵalaý, memlekettik tapsyrystyń sapasyn vaýcherlik tetik arqyly jaqsarttý kózdelgen», - dedi ol ministrliktiń apparat jinalysynda.
Vitse-ministrdiń dereginshe, biyl 15 myńnan astam tárbieshi jańa model boiynsha tiisti kýrstardan ótýde. Bul óz kezeginde tárbileý sapasyn jaqsartýǵa oń yqpal etpek.
«Ashyqtyqty qamtamasyz etý úshin kezektiliktiń biryńǵai bazasyn qurý jumys júrgizilip jatyr. Jańa oqý jylynda úzdik balabaqshalar negizinde 34 quzyrettilik ortalyǵyn ashý josparlanyp otyr. Biyl alǵash ret 25 myńnan astam balany oqý oryndaryna qaýipsiz tasymaldaý úshin arnaiy mektep avtobýstarynyń avtoparki aýqymdy túrde jańartylýda. Ákimdikter 515 mektep avtobýsyn satyp alady. Alǵashqy avtobýstar osy aidyń ishinde Aqmola oblysyna jetkizile bastaidy», - dedi Ǵani Beisembaev.
