بالاباقشاعا كەزەكتٸڭ بٸرىڭعاي بازاسى قۇرىلادى. بۇل جايىندا قر وقۋ-اعارتۋ ۆيتسە-مينيسترٸ عاني بەيسەمباەۆ ايتتى, دەپ حابارلايدى قازاقپارات.
«مەكتەپ جاسىنا دەيٸنگٸ بالالار ٷشٸن جوسپارلانعان 34 مىڭنان استام ورىندى قامتيتىن 322 بالاباقشا اشىلادى, 9,4 مىڭ ورىنعا ارنالعان 130-ى 5 ايدا اشىلادى. جىل سوڭىنا دەيٸن 3-6 جاستاعى بالالاردى بالاباقشالارمەن قامتۋ 99,3 پايىزعا دەيٸن جەتكٸزۋ بەلگٸلەنگەن. جەكەمەنشٸك بالاباقشالاردا ورىن العان كەلەڭسٸزدٸكتەرگە جول بەرمەۋ ٷشٸن قاۋٸپسٸزدٸك شارالارىن كٷشەيتٸپ, بٸلٸكتٸ ماماندارمەن قامتاماسىز ەتۋ, سونداي-اق بەينەباقىلاۋ, جيھازبەن جابدىقتاۋ تالاپتارىنىڭ ورىندالۋىن قاداعالاۋ, مەملەكەتتٸك تاپسىرىستىڭ ساپاسىن ۆاۋچەرلٸك تەتٸك ارقىلى جاقسارتتۋ كٶزدەلگەن», - دەدٸ ول مينيسترلٸكتٸڭ اپپارات جينالىسىندا.
ۆيتسە-مينيستردٸڭ دەرەگٸنشە, بيىل 15 مىڭنان استام تەربيەشٸ جاڭا مودەل بويىنشا تيٸستٸ كۋرستاردان ٶتۋدە. بۇل ٶز كەزەگٸندە تەربيلەۋ ساپاسىن جاقسارتۋعا وڭ ىقپال ەتپەك.
«اشىقتىقتى قامتاماسىز ەتۋ ٷشٸن كەزەكتٸلٸكتٸڭ بٸرىڭعاي بازاسىن قۇرۋ جۇمىس جٷرگٸزٸلٸپ جاتىر. جاڭا وقۋ جىلىندا ٷزدٸك بالاباقشالار نەگٸزٸندە 34 قۇزىرەتتٸلٸك ورتالىعىن اشۋ جوسپارلانىپ وتىر. بيىل العاش رەت 25 مىڭنان استام بالانى وقۋ ورىندارىنا قاۋٸپسٸز تاسىمالداۋ ٷشٸن ارنايى مەكتەپ اۆتوبۋستارىنىڭ اۆتوپاركٸ اۋقىمدى تٷردە جاڭارتىلۋدا. ەكٸمدٸكتەر 515 مەكتەپ اۆتوبۋسىن ساتىپ الادى. العاشقى اۆتوبۋستار وسى ايدىڭ ٸشٸندە اقمولا وبلىسىنا جەتكٸزٸلە باستايدى», - دەدٸ عاني بەيسەمباەۆ.
