Nur-Sultan qalasy Taýarlar men qyzmetter qaýipsizdigi jáne sapasyn baqylaý departamentiniń basshysy Sádýaqas Baiǵabylov balabaqshadaǵy búldirshinder men stýdentterdiń ýlanýyna qatysty oqiǵanyń mán-jaiyn túsindirip berdi, dep habarlaidy "Ult aqparat".
S.Seifýllin atyndaǵy Qazaq agrotehnikalyq ýniversitetiniń stýdentteri qazan aiynda «E.Sh.Toǵyzbaeva» jeke kásip iesi jaldap otyrǵan býfetten shokoladty bálish pen et qosylǵan palaý jegennen keiin infektsiialyq aýrýhanaǵa túsken.
Tekserý barysynda ol býfetten kelesi olqylyqtardyń bary anyqtaldy: onda konditerlik ónimderdi óndirýge qajetti jaǵdai bolmaǵan, bakteritsidtik sáýlelendirýshi berilmegen, kesetin jabdyq belgilenbegen, sapa men qaýipsizdik qujattary joq ónimder paidalanylǵan.
«E.Sh.Toǵyzbaeva» jeke kásip iesine qatysty hattama toltyrylyp, oǵan 230 AEK kóleminde aiyppul salyndy. Kemshilikterdiń kózin joiý kerektigi eskertildi.
Qyrkúiek aiynda 8 bala ýlanǵan «Happy Minds» JShS-niń jeke balabaqshasynda kelesi negizgi buzýshylyqtar anyqtaldy:
azyq-túlik taýarlaryna olardyń sapasy men qaýipsizdigi týraly qujattar joq, azyq-túlik saqtaý kezinde taýarlardy jeke qoiý tártibi saqtalmaǵan;
brakeraj týraly, taǵamdardyń sapasyn organoleptikalyq baǵalaý jáne tamaqtaný bólimi qyzmetkerlerin tekserý nátijeleri boiynsha jýrnaldar toltyrylmaidy;
sanitarlyq-epidemiologiialyq qorytyndy joq;
kiim jýatyn oryn qarastyrylmaǵan, apta saiyn tósek-oryn aýystyrý jáne jýý tártibi joq.
Tamaqtan ýlaný faktisin negizge ala otyryp, Qylmystyq kodekstiń baby boiynsha sotqa deiingi tergeý amaldary bastalyp, ruqsat qujaty bolmaǵandyqtan, sot «Happy Minds» JShS-ne aiyppul saldy. Bul balabaqsha óz bastamasymen sanitarlyq-epidemiologiialyq qorytyndy alǵanǵa deiin jumysyn toqtatyp otyr.
Aita ketý kerek, 2019 jyldyń 9 aiynda myńnan astam tekserý jumystary júrgizilgen.
Sanitarlyq erejeler men gigienalyq normalardy buzǵany úshin elordadaǵy jalpy balabaqshalarǵa 81,5 million teńge kóleminde aiyppul salynyp, onyń 71,6 million teńgesi óndirilgen. Sot organdaryna 60 material jiberilgen. 18,1 mln. teńgeni quraityn 38,1 tonna qaýipti ónim satylymnan alynyp tastalǵan.
