Almaty oblysyndaǵy balabaqshada balany urǵan tárbieshiniń ústinen ata-ana politsiiaǵa aryz túsirdi. Bul jóninde Almaty oblystyq Politsiia departamentiniń baspasóz qyzmeti málimdedi, dep habarlaidy QazAqparat.
«Balanyń ata-anasy Ile aýdandyq politsiiasyna tárbieshiniń ústinen aryz túsirdi. Tártip saqshylar qajetti saraptamany taǵaiyndady. Soǵan sáikes, protsessýaldyq sheshim qabyldanatyn bolady», - delingen atalǵan vedomstvonyń taratqan aqparatynda.
Buǵan deiin Almaty oblysyndaǵy Ile aýdanynyń Baiserke aýylyndaǵy jeke menshik balabaqshada tárbieshiniń kishkentai balany urǵan sátindegi beinejazbanyń áleýmettik jelige taraǵanyn habarlaǵan bolatynbyz. Videoda belgisiz áiel uiyqtap jatqan balany mazalap, beti men jambas tusynan urǵany anyq kórinedi Artynsha Almaty oblysy ákiminiń baspasóz hatshysy Ǵalymurat Júkel bul oqiǵaǵa bailanysty aýdandyq deńgeide arnaiy komissiianyń qurylǵanyn jetkizdi.
Esterińizge sala keteiik, shilde aiynda Taldyqorǵandaǵy jeke menshik balabaqshada osyǵan uqsas jaǵdai bolǵan. Búldirshinderge qol kótergen tárbieshiniń ústinen QR QK 141 babyna sáikes qylmystyq tergeý bastalǵanyn habarlaǵan bolatynbyz.
