Bala úshin «Álippemen» árip taný tiimdi. Bul týraly Ortalyq kommýnikatsiialar qyzmetindegi baspasóz máslihatynda QR Bilim jáne ǵylym ministri Ashat Aimaǵambetov aitty, dep habarlaidy "Ult aqparat".
«Álippege qatysty sheshim qabyldadyq. Ony biz aitqan edik. Bul - óte mańyzdy másele. Birinshiden, memlekettik standartqa engizildi. Ol ádilet organdarynda tirkeldi. Qazir baǵdarlamany daiyndap, bekitýge ázirmiz. Bul baǵdarlama eń bastysy Ahmet Baitursynov ádistemesi negizinde bolady. Biraq, ádistemeniń negizinde degen sol jyldardaǵy áriptermen, tek qana sol negizde bolady degen sóz emes. Eń bastysy - ádistemesi. Osy ádistemeniń negizinde qazaq tiliniń ózine tán qasietterin bile otyryp baǵdarlama daiyndaý mańyzdy bolyp otyr», - dedi ministr Ortalyq kommýnikatsiialar qyzmetindegi baspasóz máslihatynda BAQ ókilderiniń saýalyna orai.
Onyń atap ótýinshe, atalǵan baǵdarlama engizilgennen keiin 1-synyp oqýshylary 1 jáne 2-toqsanda Álippeni oqidy. Al 3 jáne 4-toqsanda Ana tilimen bilim alady.
«Bul óte mańyzdy. Sondyqtan tek qana formaldy jaǵynan emes, eń bastysy mazmuny jaǵynan qaraǵanda da balalar úshin tiimdi bolady. Óitkeni, balalar kele sala daiyn turǵan mátindi oqymaýy tiis. Balalar 1-synypqa ártúrli deńgeimen keledi», - dedi Ashat Aimaǵambetov.
