QR DSM Infektsiialyq aýrýlardy epidemiologiialyq qadaǵalaý basqarmasynyń basshysy Roza Qojapova «Bala súiýdi josparlaǵan juptar vaktsinadan bosatyla ma?» degen suraqqa jaýap berdi, dep habarlaidy QazAqparat.
«Jaqyn ailarda jas jubailar bala súiýdi josparlasa, ekeýi de koronavirýsqa qarsy vaktsinalaýdan bosatyla ma? Vaktsinalaýdan keiin biraz ýaqyt bala kóterýge qarsy kórsetilimder bolmai ma?», - degen suraq qoiyldy Ortalyq kommýnikatsiialar qyzmetindegi baspasóz máslihatynda.
«Eger jas jubailar jaqyn arada balaly bolýdy josparlasa, vaktsinalaýdan keiin bir ai (21-28 kún) júktilikten saqtanýǵa keńes beremiz. Sondyqtan, jas jubailarǵa keiin aýyryp qalmaý úshin, ásirese júkti kezinde bolashaq ananyń qorǵalýy úshin aldyn ala vaktsina saldyrýǵa keńes beremiz. Vaktsinadan keiin bir ai saqtaný kerek. Meniń oiymsha, bul asa uzaq ýaqyt emes», - dep jaýap berdi Roza Qojapova.
Buǵan deiin QR DSM sarapshylary vaktsinanyń birinshi dozasyn alǵan áielder júkti ekenin bilgende ne isteýi kerek degen suraqqa jaýap berdi.
«Eger áiel vaktsinanyń alǵashqy dozasyn alyp, keiin júkti ekenin bilse, qorqynyshty eshteńe joq. Oǵan ekinshi doza almaý týraly meditsinalyq anyqtama beredi. Búgingi tańda júkti áielderge vaktsina salý máselesi álem boinsha talqylanyp, qarastyrylyp jatyr», - deidi Qojapova.
Óz kezeginde QR DSM QDSUO «Sanitarlyq-epidemiologiialyq saraptama jáne monitoring ǵylymi-praktikalyq ortalyǵy» filialy direktorynyń orynbasary m.a. Manar Smaǵul da bul jaǵdaida qorqýdyń qajeti joq ekenin jetkizdi.
«Eger áiel vaktsinalaýdan keiin júkti ekenin bilse, eshqandai áreket jasaýdyń qajeti joq. Júkti áielder óz jaǵdaiyn bilmesten vaktsina alýy múmkin. Vaktsinanyń júktilikke áser etetini týraly esh aqparat joq. Sondyqtan qoryqpańyzdar jáne eshqandai áreket jasamańyzdar», - dedi Manar Smaǵul.
Onyń aitýynsha, qazir AQSh-ta júkti áielderge vaktsina salynyp jatyr.
«Bolashaqta naqty ǵylymi derekter paida bolǵan soń, biz de osyndai júieni engizemiz», - deidi M.Smaǵulova.
