Qazaqstanda múgedekter kútimine járdemaqy engizilýi múmkin. Bul týraly búgin Úkimet úiindegi baspasóz máslihatynda QR Eńbek jáne halyqty áleýmettik qorǵaý ministri Birjan Nurymbetov aitty, dep habarlaidy "Ult aqparat".
«Bala kútimine járdemaqyny arttyrý máselesine bastamashylyq jasamaqpyz. Búginde ol bala 1 jasqa tolǵanǵa deiin tólenedi. Biz bul merzimdi 1,5 nemese 3 jylǵa deiin uzartý nusqasyn qarastyryp otyrmyz. Qazirgi ýaqytta shamamen 387 myń ana bala kútimine bailanysty atalǵan járdemaqyny alady. Onyń ishinde Áleýmettik saqtandyrý qorynan alatyndardyń sany azdaý ǵana», - dedi Birjan Nurymbetov.
Máselen, onyń dereginshe, jumys istemeitin analar biýdjetten ai saiyn 1 jyl boiy 15-24 myń teńge alyp otyrady. Al jumys isteitin analar Áleýmettik saqtandyrý qorynan ai saiyn jalaqysynyń shamamen 40 paiyzyn alady. Sonymen qatar ministr múgedektik boiynsha járdemaqyny qaita qarastyrý josparlanyp otyrǵandyǵyn aitty.
«Erekshe qajettilikteri bar adamdarǵa memlekettik qoldaý kerek. Biz múgedektigi úshin kútimge járdemaqy tóleý bastamasyn kótermekpiz. Búginde ata-analar men qamqorshylarǵa múgedek bala kútimine, sonymen qatar bala kezinen birinshi toptaǵy múgedek bala kútimine járdemaqy qarastyrylǵan. Biraq, bala kezinen múgedek emes birinshi toptaǵy eresek múgedekter bar. Olar da kútimdi qajet etedi. Sondyqtan qosymsha járdemaqy engizý durys bolar edi. Bul ázirshe ministrliktiń jospary ǵana. Úkimetke jáne atqarýshy organdarmen kelisýge áli engizilgen joq», - dedi ol.
