Búgin Memleket basshysynyń tapsyrmasymen QR Premer-Ministri Baqytjan Saǵyntaev jumys saparymen Shyǵys Qazaqstan oblysyna keldi, dep habarlaidy primeminister.kz.
Prezidenttiń «Qazaqstandyqtardyń ál-aýqatynyń ósýi: tabys pen turmys sapasyn arttyrý» atty Joldaýynda alǵa qoiǵan negizgi mindetterdi túsindirý maqsatynda Semei jáne Óskemen qalalarynda aktivpen jáne jurtshylyqpen kezdesýler ótedi.
Semei qalasynda aktivpen jáne jurtshylyq ókilderimen Prezident Joldaýynyń negizgi baǵyttary talqylanady. Atap aitqanda, halyqtyń tabys deńgeiin arttyrý, bilim berý men densaýlyq saqtaý sapasyn jaqsartý, turǵyn úidiń qoljetimdiligi máseleleri qaralady. Buǵan qosa, Premer-Ministr birqatar áleýmettik jáne ónerkásiptik nysandardy aralap, solardyń negizinde óńirde «Nurly jol», «Nurly jer», «Densaýlyq» jáne t.b. memlekettik baǵdarlamalardyń iske asyrylýymen tanysady.
Oblys ortalyǵynda aktivpen jáne jurtshylyqpen kezdesýde halyqtyń ál-aýqatyn arttyrýǵa baǵyttalǵan áleýmettik mindetterge basa kóńil bólinedi. Kóptegen máseleler, sonyń ishinde indýstriialandyrýdy, shaǵyn jáne orta biznesti, AÓK damytýdyń, óńirlerdi turaqty damytýdyń jańa tásilderi qaralady. Óskemendegi óńdeý ónerkásibiniń iri nysandary men bilim berý mekemelerin aralaý josparda bar.
Óńirge jasalǵan jumys sapary Semei qalasynan bastaldy. Premer-Ministr ushyp-qoný jolaǵy men aerovokzaldy rekonstrýktsiialaý nátijesimen tanysty. Shyǵys Qazaqstan oblysynyń ákimi D. Ahmetovtyń baiandaýynsha, áýejaidy jańǵyrtý reister men jolaýshylar sanyn ulǵaitýǵa, sondai-aq, ushý kezindegi qaýipsizdik deńgeiin arttyrýǵa jol ashady.
2016 jylǵy jeltoqsanda «Nurly jol» memlekettik baǵdarlamasy aiasynda bastalǵan áýejaidy rekonstrýktsiialaý jumystary biyl aiaqtalady. Jobany iske asyrý ushý-qoný jolaǵyn, jer ústimen júrý joldaryn jáne perrondy, sondai-aq, aerovokzal ǵimaratyn jóndeýdi qamtydy. Ushý-qoný jolaǵyna qatysty jumystar tolyqtai aiaqtalǵan: búgingi tańda atalǵan jolaq oblysaralyq jáne oblysishilik aviareisterdiń áýe kemelerin qabyldap, jóneltedi. Osy jyldyń 2 qyrkúieginen bastap ushý-qoný jolaǵy «Óskemen - Semei - Úrjar», «Semei - Almaty», «Semei - Astana» baǵyttary boiynsha An-24 tipindegi ushaqtardy qabyldaidy. Aerovokzalǵa qatysty jalpy aiaqtalǵan jumystar búginde 93% quraidy.
Jańǵyrtý qorytyndysy boiynsha áýejai «V» sanatyndaǵy halyqaralyq áýejailarǵa arnalǵan IKAO (Halyqaralyq azamattyq aviatsiia uiymy) talaptaryna sai bolady. Al bul 300 jolaýshyǵa deiin tasymaldai alatyn Boeing, Airbus, IL-76 tipindegi áýe kemelerin qabyldaýǵa múmkindik beredi. Iaǵni, táýligine 25-30 reiske deiin, saǵatyna 200 adamǵa deiin qyzmet kórsetýge jol ashylady. Jolaýshylar terminalynyń ǵimaraty qaýipsiz paidalaný talaptaryna jaýap beretin bolady, al ol jolaýshylarǵa qyzmet kórsetý sapasyn edáýir jaqsartady.
«Scat, Qazaq air, Bek air, Air Astana sekildi otandyq aviakompaniialardy tartýmen qatar, Resei Federatsiiasyna, Túrkiiaǵa, Mysyrǵa, Birikken Arab Ámirlikterine halyqaralyq reisterdi uiymdastyrýǵa múmkindik týady. Aerovokzalda halyqaralyq jáne ishki áýe qatynastarynyń jekelegen zaldary paida bolady, zamanaýi tekserý jabdyǵy ornatylady. Jalpy, keshende 250-den astam adamǵa jumys orny ashylady», - dep baiandady Shyǵys Qazaqstan oblysy ákiminiń orynbasary S. Aqtanov.
Eske sala keteiik, Premer-Ministr Memleket basshysynyń tapsyrmasymen el óńirlerin jumys saparymen aralap júr. Osyǵan deiin Baqytjan Saǵyntaev Atyraý, Aqtóbe, Qaraǵandy, Qostanai, Qyzylorda, Mańǵystaý, Ońtústik Qazaqstan (qazirgi Túrkistan), Batys Qazaqstan, Soltústik Qazaqstan, Aqmola jáne Pavlodar oblystarynda jumys saparlarymen boldy.
