Almatyda meditsinalyq qyzmetterdiń sapasy artady. Bul týraly Almaty qalasynyń ákimi Baqytjan Saǵyntaev «Dýman» yqshamaýdanynyń turǵyndarymen ótken kezdesýde aitty, dep habarlaidy QazAqparat.
Shahar basshysy Baqytjan Saǵyntaev Medeý aýdany ákiminiń eseptik kezdesýine qatysty. Jiynda Sultanbek Almasbekuly aýdannyń áleýmettik-ekonomikalyq damýy men sheshilgen infraqurylymdyq máseleler týraly baiandady.
Ótken jyly jalpy uzyndyǵy 33 shaqyrym bolatyn 19 kósheniń syrtqy jaryqtandyrý jelisiniń qurylysy aiaqtaldy. 1084 jaryq núkteleri ornatyldy. Aǵymdaǵy jyly 279 kóshede jáne 27 aýlada 6200 jaryq núktesin ornatý josparda.
Qala ákiminiń tapsyrmasy boiynsha, ótken jyly Kerei men Jánibek han kósheleriniń máselesi sheshildi. Munda kóshkin saldarynan jeke úilerdiń qulaý qaýpi bolǵan. Qazirgi ýaqytta betkeidi nyǵaitý jumystary aiaqtaldy. Jol jóndelip, abattandyrý jumystary júrgizildi.
Sondai-aq birneshe jyldan beri kóktemgi jáne kúzgi ýaqytta «Terisbulaq» ózeniniń boiyndaǵy 50-den astam jeke turǵyn úidi sý basatyn. Bul máselede óz sheshimin tapty. Ózen arnasyn tereńdete otyryp, qalpyna keltirý-nyǵaitý jumystary júrgizildi.
Sonymen qatar, 2019 jyly Medeý aýdanyna qarasty 52 aýlaǵa kúrdeli jáne 30 aýlaǵa aǵymdaǵy jóndeý jumystary júrgizildi. Biyl taǵy 41 aýla qaita qalpyna keltiriledi. Qala ákiminiń tapsyrmasy boiynsha «Taý-Samal», «Keńsai», «Kólsai», «Sulýsai» yqshamaýdandarynda 4 feldsherlik-akýsherlik pýnkt ashyldy. Osylaisha 12 myńnan astam turǵynǵa meditsinalyq kómektiń qoljetimdiligi qamtamasyz etildi.
Eseptik jiynǵa qatysqan qala ákimi Baqytjan Saǵyntaevtyń aitýynsha, meditsinalyq mekemelerdi jabdyqtarmen qamtamasyz etý máselesi ózektiligin joiǵan emes. Ótken jyly júrgizilgen aýdit qalanyń emhanalary men aýrýhanalarynyń jabdyqtalýy nebári 20%-dy quraitynyn kórsetti.
«Sondyqtan biz qalanyń meditsinalyq mekemelerin jańartý men qajetti jabdyqtarmen jaraqtandyrýdyń úsh jyldyq josparyn ázirledik. Osylaisha medmekemelerdiń jabdyqtalýyn 90%-ǵa jetkizbekpiz. Osy jylǵa qarajat bólindi», – dedi qala ákimi.
Kezdesýdi qorytyndylai kele, Baqytjan Saǵyntaev turǵyndardy ashyq áńgimesi úshin alǵys bildirip, mundai kezdesýler ákimdiktegilerge turǵyndardyń talap-tilegin jaqynyraq bilýge múmkindik beretinin aitty.
«Shaǵyn ýchaskelerdegi mundai kezdesýler ár aýdanda ótýde. Turǵyndardyń belsendiligi jergilikti sipattaǵy problemalardy jedel sheshýge, sondai-aq qysqa merzimdi jáne orta merzimdi damý josparlaryna túzetý engizýge septigin tigizedi», – dep atap ótti Baqytjan Saǵyntaev.
