QR Premer-Ministri Baqytjan Saǵyntaev Aqtóbe oblysyna jumys sapary barysynda óńirdegi asa iri jylyjai keshenderiniń birinde boldy, - dep habarlaidy "Ult aqparat" primeminister.kz portalyna silteme jasap.
Nysandy aralaý kezinde QR Premer-Ministri gaz-týrbinaly stansa jumysymen, kókónisterdi ósirýdiń gollandiialyq tehnologiialary qoldanylatyn jylyjai ǵimaratymen tanysty, sondai-aq aýyl sharýashylyǵy tehnikasy men jabdyqtar kórmesi Premer nazaryna usynyldy.
Gollandiialyq tehnologiia boiynsha salynǵan «Grin Haýs Qazaqstan» kesheni óz jumysyn «QazAgroQarjy» AQ qoldaýymen Indýstrialdy-innovatsiialyq damý memlekettik baǵdarlamasy aiasynda júzege asyrady. Jobanyń júzege asyrylýy óz óndirisi esebinen oblystyń jas kókónisterge degen qajettiligin tolyǵymen qamtamasyz etýge, sondai-aq artyq ónimdi eksportqa jiberýge múmkindik beredi.
Premer-Ministrge eksportty ulǵaitý jóninde júrgizilip jatqan jumystar týraly, sonymen qatar Memleket basshysynyń tapsyrmalarynyń oryndalýy, atap aitqanda, aýyl sharýashylyǵy ónimderin óńdeý deńgeiin arttyrý, sýarylatyn jerlerdi qalpyna keltirý, aýyl sharýashylyǵy kooperativterin qurý, sondai-aq aýyl sharýashylyǵy salasynda ǵylymnyń damýy týraly baiandaldy.
Aita ketý kerek, AÓK-tiń damýy elimizdiń jaqyn bolashaqtaǵy basymdyqty baǵyttarynyń biri retinde aiqyndalǵan. Osy oraida 2017 jyldan bastap Úkimet 2017-2021 jyldarǵa arnalǵan AÓK-ti damytýdyń jańa Memlekettik baǵdarlamasyn júzege asyrýdy bastady, onyń basty maqsaty jinalatyn ónimdi arttyrý jáne sala kásiporyndarynyń qaita óńdeý, júktelý úlesin kóterý bolyp tabylady.
