20 aqpanda baspager Baqytjan Buqarbai ulttyq qoǵamdyq senim keńesi quramynan shyǵatynyn málimdedi. Keńestiń saiasi reformalar tobynda jumys istegenin aitqan belsendi halyq armandaǵan "saiasi reformalar júzege asyp qalar ma degen úmitpen keńes múshesi bolýǵa keliskenin", biraq úmitiniń aqtalmaǵanyn jetkizdi.
"Ókinishke qarai, ministr Abaevtyń vedomstvosy ázirlegen "Beibit jiyndar týraly" zań jobasy Prezidenttiń tapsyrmasyna sai bolmai shyqty jáne ol - azamattardyń múddesine qaishy. Buǵan deiin saiasi tutqyndardyń áli kúnge deiin bosamaǵanyn da aita ketken jón. Janbolat Mamaiǵa partiia qurýda tosqaýyldar jasalyp jatqanyn kórip júrmin" dedi Buqarbai videomálimdemesinde.
Ol ulttyq keńestiń usynystaryna biliktiń qulaq aspaitynyna kózi jetkenin aityp, qoǵamdyq keńesti "eldegi saiasi reformalarǵa esh áser ete almaityn uiym" dep atady.
"Halyqtyń múddesine qaishy áreketter men piǵyldardy zańdastyrýǵa aralasqym kelmeidi" dedi málimdeme sońynda.
Baqytjan Buqarbai - byltyr halyq narazylyǵy jiilegen tusta jańadan sailanǵan prezident Qasym-Jomart Toqaev qurǵan ulttyq qoǵamdyq senim keńesi quramynan shyqqan alǵashqy adam.
Toqaev 17 shildede arnaiy jarlyqqa qol qoiyp, ulttyq qoǵamdyq senim keńesi quramy men erejesin jariialap, ózi keńes tóraǵasy bolǵan.
2019 jyly 20 jeltoqsanda Nur-Sultanda ótken qoǵamdyq senim keńesi jiynynda Toqaev qyrkúiektegi Joldaýynda aitylǵan «saiasi modernizatsiia jasaý» jaily ýádelerinen taimaitynyn, Qazaqstandaǵy «saiasi ózgeristerge bastaityn» birneshe usynysyn jetkizgen.
Toqaev aitqan «Beibit jiyndar týraly» jańa zań jobasy jaqynda qoǵam talqylaýyna shyǵaryldy. Qazaqstandyq sarapshylar úkimet ázirlegen beibit miting týraly zań jobasynda azamattardyń konstitýtsiialyq bostandyqtaryn paidalaný quqyǵyn shekteitin burynnan kele jatqan erejeler baryn aityp synaǵan edi. Al bilik jobany ázirlegende halyqaralyq tájiribe eskerildi deidi.
Resmi málimetke sáikes, ulttyq qoǵamdyq senim keńesi memlekettik baǵdarlamalar men zańdardyń jobalaryn qoǵamdyq saraptamadan ótkizip, jurt pikirin eskerip, strategiialyq máselelerdi qarap, "halyq, saiasi partiialar jáne bilik arasynda dialog" ornatýy tiis.
Ulttyq qoǵamdyq senim keńesine 44 adam múshe. Eger Baqytjan Buqarbai quramynan shyqsa, keńeste 43 adam qalady.
