Túrkistan oblysynda «2-10-20» áleýmettik «Baqytty otbasy» baǵdarlamasyna qujat qabyldaý bastaldy, – dep habarlaidy oblys basshysynyń baspasóz qyzmeti.
Túrkistan oblysy turǵyndaryna ózi turatyn aimaqtan, aýdan ortalyqtary ne Túrkistan, Kentaý qalalarynan baspana satyp alýǵa múmkindik berildi. Shart boiynsha, bolashaq úi iesiniń jáne birge turatyn otbasy músheleriniń atynda baspana bolmaýy tiis.
Tabysy tómen otbasylarǵa turǵyn úi satyp alýǵa arnalǵan nesielendirý baǵdarlamasyna úi kezeginde turǵan kópbalaly otbasylar, tolyq emes otbasylar jáne múmkindigi shekteýli balasy bar otbasylar ǵana qatysa alady.
Túrkistan oblysynda kezekke tirkelgen azamattardyń úlesine 400-den astam páter bólingen. Turǵyndar «Baqytty otbasy» baǵdarlamasy aiasynda «Turǵyn úi qurylys jinaq bankimen» kelisimshartqa otyrýlary tiis.
Bank 10 million teńgege deiin nesie beredi. Nesieniń jyldyq mólsherlemesi - 2%, bastapqy jarna -10%, nesie 20 jylǵa deiin beriledi. www.hcsbk.kz saity arqyly ne kez kelgen uialy telefonnan 300 (Qazaqstan boiynsha tegin) nómirine habarlasyp keńes alýǵa bolady.
