Búgin, 3 tamyzda №2 qalalyq sotta Atyraý oblysy ákiminiń burynǵy orynbasary Baqtygúl Hamenovanyń isi boiynsha alǵashqy sot otyrysy ótti, dep habarlaidy "Ult aqparat" jergilikti Aqjaiyq basylymyna silteme jasap.
Sot protsesi qazaq tildi aýdarmashynyń qatysýymen orys tilinde ótedi. Otyrys tańǵy saǵat 9:30-ǵa belgilendi. Alaida qaraýyl sottalýshy Hamenovany saǵat 10-ǵa jaqyn ákeldi. Otyrys jarty saǵattai ýaqytqa sozyldy. Sýdia Jumabek Táshimov qaraýyldarǵa keshigip kelgeni úshin eskertý jasady.
Sot otyrysyna Atyraý oblystyq prokýratýra basqarmasynyń prokýrory, kishi ádilet keńesshisi Laýra Asanova qatysty.
Sot zalynda adam kóp – týystary men tanystary, sondai-aq Hamenovanyń jaqtastary, BAQ ókilderi de boldy.
Sýdia Táshimov protseske qatysýshylardan sot qabyrǵasyndaǵy aýdio-beine jazbaǵa qarsylyqtary bar-joǵyn surady. Barlyǵy, onyń ishinde Hamenovanyń ózi de qarsylyǵymyz joq dep jaýap berdi.
Is boiynsha oblystyq mádeniet basqarmasynyń basshysy Aqylbek Rysqaliev pen «Balqytý» JShS direktory Ómirtai Adamov ta sottalýshy retinde qatysyp jatyr. Hamenova men Rysqalievtyń advokattary - Igor Vranchev pen Nurlan Jolbolov, al Adamovtyń advokaty - nursultandyq Marat Azmaǵambetov.
Sýdia Hamenovadan “aiyptaý aktisiniń kóshirmesin aldyńyz ba?” dep surady. Ol “joq” dep jaýap berdi.
“Tergeý izoliatorynda otyrǵanyma 8 ai ótse de, aiyptaý aktisiniń kóshirmesin alǵan joqpyn. Árine, maǵan tergeýshiler de, prokýrorlar da keldi. Sol kúni bizdiń túrme kúzetshileri maǵan bireý kelgenin aitty. Olardyń arasynda meniń advokatym bar ma dep suradym, eger advokatym bolmasa, shyqpaitynymdy aittym, - dedi Hamenova.
Sýdia Táshimov Qylmystyq is júrgizý kodeksiniń normalaryna sáikes, sottalýshyǵa aiyptaý aktisiniń kóshirmesi berilgennen keiin sot otyrysyn keminde úsh kúnnen keiin jalǵastyrýǵa bolatynyn aitty. Sondyqtan kelesi otyrys 11 tamyzǵa belgilendi.
Eske salsaq, 2021 jyldyń 22 jeltoqsanynan beri B.Hamenova tergeý izoliatorynda otyr. Ol 10 jeltoqsanda Atyraýda 145 million teńgege Abai eskertkishin daiyndaý jáne ornatý úshin memlekettik satyp alý týraly shart jasasý úshin JShS basshysynan 4,5 million teńge para aldy degen kúdikpen ustaldy. Qylmystyq is QR Qylmystyq kodeksiniń 366-babynyń 2-bóligi («Aitarlyqtai mólsherde para alý») boiynsha tergelýde.
Buǵan deiin oblys ákimdiginde habarlanǵandai, «2018 jylǵy 7 shildede Mádeniet jáne sport ministrligi janyndaǵy monýmentaldy ónerdiń jańa qurylymdaryn ornatý jónindegi komissiia Abai eskertkishin ornatý ideiasyn maquldady. 2019 jyldyń 22 sáýirinde ashyq konkýrs jariialanyp, sol jyldyń 20 qarashasynda komissiia músinshi Asqar Nartovtyń jobasyn tańdap, eki jyldan keiin qalalyq mádeniet bólimi «Balqytý» JShS-men 145 mln teńgege kelisimshartqa otyrdy. Biyl 72 mln 499 myń teńge bólinip, bul aqsha igerildi. Qalǵany 2022 jyldyń biýdjetinen bólinedi».
Byltyr jeltoqsanda Hamenova tergeý izoliatoryna birden otyrǵan joq. Jaýap alynǵannan keiin ony ýaqytsha ustaý izoliatoryna qamady. Sodan keiin Atyraý qalasynyń tergeý soty oǵan úiqamaqqa alý týraly sanktsiia berdi. Biraq keiin oblys prokýratýrasynyń ótinishimen bultartpaý sharasy anaǵurlym qatań: tergeý izoliatoryna qamaýda ustaý sharasyna ózgerdi. Bul sheshimdi oblystyq sot: «jetekshi laýazymdy atqarǵan jáne osy óńirde yqpaly men myqty áleýmettik bailanysy bar Baqytgúl Hamenova protseske qatysýshylarǵa qysym jasap, istiń obektivti tergelýine kedergi keltirýi múmkin» dep túsindirdi. Aita ketý kerek, áleýmettik jelide kópshilik osynaý qatań bultartpaý sharasyn maquldady.
Ainur SAPAROVA
Sýretter men beinejazbany túsirgen avtor
