Parlament Májilisiniń jalpy otyrysynda depýtat, aýǵan soǵysy ardageri Baqytbek Smaǵul QR Premer-Ministriniń orynbasary Erbolat Dosaevqa depýtattyq saýal joldady. Óz saýalynda ol batyr babalardyń esimderin elimizdiń ár óńirindegi shekara zastavalaryna berýdi usyndy, dep habarlaidy "Ult aqparat".
«Elbasy óziniń «Bolashaqqa baǵdar: rýhani jańǵyrý» atty baǵdarlamalyq maqalasynda: «Jańa turpatty jańǵyrýdyń eń basty sharty - ulttyq kodyńdy saqtai bilý. Onsyz jańǵyrý degenińizdiń qur jańǵyryqqa ainalýy op-ońai», - dep atap kórsetti. Bizdiń batyr babalarymyz aýmaǵy jóninen álemde toǵyzynshy oryndy alatyn, o sheti men bu shetine qulan jortsa tuiaǵy tozatyn, qyran ushsa qanaty talatyn ulan-ǵaiyr jerdiń shebin ǵasyrlar boiy qanyn tókse de, aryn tókpesten, janqiiarlyqpen qorǵady. Búgingi beibit zamanda Uly Dalamyzdyń shebin qorǵaýshy jaýynger-shekarashylar da sol batyr babalarymyzdyń búgingi býyny bolyp tabylady. Búginde 5 memleketpen shektesetin jáne jalpy uzyndyǵy 15 myń shaqyrymdai bolatyn shekaramyzda 300-ge jýyq shekara zastavasy qurylǵan. Osy zastavalarǵa san taraptan suqtanǵan jat jurtqa Atamekenniń qarys qadamyn da ustatpai, urpaǵyna tolyq miras etken batyr babalarymyzdyń atyn bersek, oryndy bolar edi», - dep toqtaldy Májilis depýtaty Baqytbek Smaǵul Úkimet basshysynyń orynbasary Erbolat Dosaevqa joldaǵan depýtattyq saýalynda.
Onyń paiymynsha, osyndai qadamnyń ulaǵatty úlgisi bar.
«2017 jyldyń 3 sáýirinde qabyldanǵan №157-shi Úkimet qaýlysyna sáikes, Ózbekstanmen aramyzdaǵy shekaradaǵy Qyzylorda shekara otriadynyń 2019-shy áskeri bóliminiń «Qyzylqum» shekara zastavasy Janqoja batyrdyń atymen qaita ataldy. Osynyń aldynda, 2014 jyly Qyzylorda oblysynyń Qazaly aýdanynda ótken, Janqoja Nurmuhammedulynyń 240 jyldyǵyna arnalǵan respýblikalyq aýqymdaǵy is-shara barysynda Qyzylqumdaǵy shekara beketine batyrdyń esimin berý bastamasyn kótergen bolatynmyn. Bul bastama júzege asty jáne bul Qazaqstannyń Shekara qyzmeti quramyndaǵy onynshy ataýly zastava bolyp otyr.Bul birinshiden, el shebi men ulttyq qaýipsizdikti qorǵaýshy shekarashylarymyzdy darhan dalaǵa qalqan bolǵan batyr babalardyń uly rýhynda, Máńgilik eldiń maqsat-muratynda tárbieleýge úles qosady. Ekinshiden, Qazaqstan tarihynda erekshe oryn alar tulǵalardyń atyn máńgi qaldyrýǵa qyzmet etedi. Úshinshiden, Elbasy rýhani jańǵyrýdyń «Týǵan jer» baǵdarlamasy aiasynda usynǵandai, bul «esimderi el esinde saqtalǵan birtýar perzentteri» arqyly jas urpaqtyń týǵan jer tarihyn tanýyna yqpal jasaidy», - deidi depýtat.
Onyń sózine qaraǵanda, batyr babalar atymen atalǵan shekaralyq zastavalar - ózge memleketter azamattaryna Qazaqstandy áz tarihyn jáne er ulandaryn ulyqtaityn, umytpaityn, solardyń biik rýhymen rýhtanatyn ór ári órkendi el retinde kórsetip turady. Bul bastama metsenattardy shekaralyq zastavalarǵa kómek kórsetip, qamqorlyq jasaýǵa tartýǵa jol ashady. Óitkeni shekarashylar óz qyzmeti úshin qajettiniń barlyǵymen qamtamasyz etilgenimen, shekaralyq zastavalardyń kóbi keńes zamanynda turǵyzylǵan jáne materialdyq-tehnikalyq bazasy toza bastaǵan.
«Qurmetti Erbol Asqarbekuly, joǵaryda aitylǵandy eskere otyryp, endi Bógenbai, Qabanbai, Qarasai, Naýryzbai, Er Jánibek, Raiymbek, Jalańtós Bahadúr jáne basqa da baiyrǵydan bergige deiingi batyrlarymyzdyń esimderin elimizdiń ár óńirindegi shekara zastavalaryna berý máselesin qarastyryp, tiisti nusqaý berýińizdi suraimyn. Qazaqstannyń ejelgi jáne keiingi tarihyndaǵy uly tulǵalardy ulyqtaý ulttyq sanany jańǵyrtýǵa baǵyttalǵan mańyzdy qadamǵa ainalary anyq», - dedi Baqytbek Smaǵul.
