Qazaqstan qarjy ministri Baqyt Sultanov úkimet, Ulttyq bank pen kvazimemlekettik sektor klientteri esepshotynan aqshalaryn berýden bas tartqanyna jáne kartamen tólem jasai almai jatqanyna shaǵymdanǵan Bank RBK máselesin "tekserip" jatqanyn málimdedi, dep habarlaidy "Ult aqparat" Azattyqqa siteme jasap.
Astanada ótken úkimet jiyny arasynda Sultanov bankke qatysty kelissózderdiń nátijesi týraly birdeńe deýge ázirge "áli erte ekenin" aitty.
3 qarashada "Nur Otan" partiiasynyń jiynynda Qazaqstan prezidenti Nursultan Nazarbaev Bank RBK-ke qatysty shaǵymdardy estip, bilip otyrǵanyn málimdegen. Prezident banktegi jaǵdai "aktsionerlerdiń urlyǵynan týǵan másele" ekenin aityp, "aktsionerlerdiń esin jidyrýǵa" ýáde bergen. "Urylar ózderine tiisti jerde otyrady. Olarǵa aqshany qaitartqyzamyz, bank jumysyn qalpyna keltiremiz. Aktsionerler, ásirese jeke tulǵalar óz qarjysyn ala alady" dedi Nazarbaev. Degenmen, Bank RBK-dan qarjy jymqyrylǵanyn dáleldeitin sot sheshimi týraly aqpar nemese banktiń qandai da bir zań buzǵany týraly fakt ázirge ashyq derekkózderine túsken joq.
Qazan aiynyń basynda BAQ-ta Bank RBK jeke jáne korporativtik klientteriniń aqshasyn alýyna ishinara shekteý qoiǵany habarlanǵan. Bank kassasynan jáne bankomattan aqsha alý operatsiialaryna shekteý salynǵan. Ótken aptada bank salymshylary - jeke tulǵalar banktiń depozitterinen aqsha berýdi toqtatqanyna shaǵymdanǵan.
11 qazanda bank aktsionerleriniń biri Vladimir Kim basqa aktsionerlermen, Ulttyq bankpen jáne Qazaqstan úkimetimen kelissóz uiymdastyryp, bankti qosymsha kapitaldandyrý sharttaryn sóilesip jatqanyn habarlaǵan. Aktiviniń kólemi jaǵynan eń iri on bank qataryna kiretin Bank RBK ol kezde qarjylyq jaǵdaiyn nyǵaitýdyń álde bir sharalaryn daiyndap jatqanyn málimdegen.
18 qazanda Ulttyq bank Bank RBK-ge jazbasha uiǵarym túrinde yqpal etý arqyly shekteý sharasyn qoldanǵan. Sol kúni ulttyq bank tóraǵasy Daniiar Aqyshev Bank RBK aktsionerlerimen jáne negizgi kreditorlarymen qyzý kelissóz júrgizilip jatqanyn aitqan.
