Qala ákiminiń qabyldaýyna kelgen qala turǵyndary turǵyn úi máselesi, tirkeýge turý jáne AÁK alý máselelerin sheshýge kómektesýdi ótindi, dep habarlaidy "Ult aqparat" elorda ákimdiginiń resmi saityna silteme jasap.
Baqyt Sultanov kezekti rette azamattardy qabyldady. Qabyldaýǵa kópbalaly analar keldi. Olar kótergen basty máseleler - turǵyn úi, ataýly áleýmettik kómek alýdaǵy qiyndyqtar, balalardy balabaqshalarǵa jáne jazǵy lagerlerge ornalastyrýǵa qatysty boldy.
Máselen, Uljan Myrzageldieva - tórt balany tárbielep jatqan jalǵyzbasty ana. Ol balabaqshada jumys isteidi. Qazirgi tańda memlekettik qyzmetker retinde jalǵa beriletin turǵyn úi kezeginde tur. Kezekte ol 7183-shi orynda. Alatyn jalaqysy - 80 myń teńge jalǵyz basty anaǵa qarjy jinap, «Turǵynúiqurylysjinaqbankiniń» baǵdarlamalaryn paidalanýyna múmkindik bermeidi. Sondai-aq, januiasyna AÁK tólenbeitindigi belgili boldy. Onyń birneshe sebebi bar: atap aitqanda, birinshi toqsanda jan basyna shaqqandaǵy ortasha tabys «kedeilik sheginen» joǵary bolǵan. Bir aida berilgen premiianyń esebinen Uljan Myrzageldieva AÁK ala almai otyr.
«Olar AÁK jańa format boiynsha sanady. Aiyrmashylyq 5 myń teńgege jýyq», - dedi qoǵamdyq damý isteri basqarmasynyń basshysy Daniiar Esin ákimge.
Baqyt Sultanov jumyspen qamtý jáne áleýmettik qorǵaý basqarmasynyń ókilderine jaǵdaidy taǵy da bir márte qarap, AÁK esepterin qaita sanaýdy tapsyrdy. Ákimniń jeke qabyldaýyna kelgen analardyń barlyǵyn turǵyn úi máselesi alańdatady. Olar ákimnen memlekettik qordan turǵyn úidi bólýdi jedeldetýdi surady.
«Turǵyn úi kezekke sai beriledi. Kezekti ainalyp ótý múmkin emes, olai bolmaidy da. Biraq biz kópbalaly otbasylardyń turǵyn úi máselesin múmkindiginshe jyldam sheshýge tyrysamyz. Turǵyn úi alýdyń túrli nusqalary bar. Ózderińiz biletindei, Elbasy kópbalaly otbasylarǵa jylyna 2% jeńildikpen nesie berýdi tapsyrǵan. Bul sharalar Úkimettiń jeńildetilgen ipotekalyq nesie erejelerin bekitkennen keiin júzege asyrylatyn bolady», - dedi qala ákimi.
Qazir Nur-Sultanda 12 myńǵa jýyq kópbalaly otbasy bar. Olardyń 2969-y turǵyn úi kezeginde tur. Ákimdikte turǵyn úige muqtaj adamdar tiisti qujattardy usynyp, turǵyn úi alý úshin resmi túrde kezekke turý kerektigin eske saldy.
Kópbalaly analar kótergen taǵy bir másele - turǵylyqty jeri boiynsha tirkelý, bul sondai-aq, AÁK alý úshin de qajet. Páter ieleri kópbalaly otbasylarǵa turǵyn úidi jalǵa bergisi kelmeitinin, sondyqtan analar páter jaldaǵan kezde balalardy páter ielerinen jasyrýǵa májbúr ekendigin aitty. Al eger jalǵa bergen kúnniń ózinde jalǵa alý qujatyn rásimdegisi kelmeidi. Olar mundaiǵa kommýnaldyq tólemaqynyń kóterilmeýi úshin barady. Eger tirkeýdi resimdese, kommýnaldyq tólem ósedi.
«Biz «rezeńke páterlermen» kúresýimiz kerek, jalǵa beriletin biznes zańdy bolýy kerek. Eger olar jaldamaly turǵyn úi arqyly tabys tapqysy kelse, bárin resmi túrde jasaýy tiis. Múmkin, bul baǵalardyń belgili bir deńgeide ulǵaiýyna alyp keler, biraq tártip bolady», - degen ákim páterdi jalǵa berýshilerge áser etý joldaryn ázirleý úshin politsiia bóliminiń ókilderimen, basqa múddeli vedomstvolarmen kezdesý ótkizýge tapsyrma berdi.
Analar ákimge AÁK alý qiyndyqtary týraly shaǵymdandy: shynymen maqsatty kómekke muqtaj bola tura, olardyń kópshiligi ony alý kriteriilerine sáikes kelmeidi. Analar zańnamany jetildirý kerek dep sanaidy. Bul másele jergilikti biliktiń quzyretine kirmeitindikten, usynystardy Jumyspen qamtý jáne áleýmettik qorǵaý ministrligine berý týraly sheshim qabyldandy.
Budan bólek, kópbalaly otbasylardaǵy balalarǵa arnalǵan jeńildikter týraly aqparat berildi: balabaqshalarǵa tegin barý, qoǵamdyq kólikte tegin júrý, jazǵy lagerlerge barý. Qazir tegin joldamalar az qamtylǵan otbasylardan shyqqan balalarǵa berilýde. Biraq eger otbasy tabysy az dep eseptelmese de, birden tórt balany jazǵy lagerge jiberý múmkin emes. Bul másele birden sheshildi. Baqyt Sultanov barlyq kópbalaly otbasylardan shyqqan balalarǵa lagerlerge aqysyz joldamalar berýdi bilim basqarmasy basshysynyń orynbasary Dýlat Jekebaevqa tapsyrdy.
Osy jyldyń aqpanynan bastap qala ákimi 300-ge jýyq azamatty qabyldady, onyń kóbisi - kópbalaly analar.
