QR Saýda jáne integratsiia ministri Baqyt Sultanov Eýraziialyq Damý Bankiniń (EADB) tóraǵasynyń EAEO qatysýshy elderi úshin biryńǵai valiýtany jasaý týraly málimdemesine qatysty pikir bildirdi, dep habarlaidy QazAqparat.
- Baqyt Turlyhanuly, osy jyldyń 25 qyrkúieginde Eýraziialyq Damý bankiniń tóraǵasy Andrei Belianinov «Rossiiskaia gazetaǵa» bergen suhbatynda EAEO úshin biryńǵai valiýta shyǵarý týraly, onyń ataýy men EAEO bolashaq ortalyq bankiniń úlgisi retinde EADB-daǵy orny týraly aitty. Buǵan qatysty qandai pikir bildiresiz? Bul pikirdiń negizi bar ma?
- Men birden aitaiyn, EADB - bul integratsiialyq sipattaǵy investitsiialyq jobalardy qarjylandyratyn halyqaralyq damý institýty. Sondyqtan, meniń oiymsha, onyń EAEO aiasynda biryńǵai valiýtany engizý máselesin talqylaýǵa quqyǵy joq jáne bolmaidy.
Múmkin, bul Andrei Iýrevichtiń sarapshy retindegi jeke ustanymynyń kórinisi shyǵar, ony kez kelgen adam aita beredi.
Shynynda da, ártúrli saittardaǵy sarapshylar men BAQ bul máseleni jii qozǵaidy.
Alaida, bizdiń azamattarymyz EAEO-nyń barlyq normativtik bazasy ár qatysýshynyń egemendigi máselelerin qatań saqtaitynyn umytpaǵany jón. Valiýtalyq retteý jáne saýda esepterin júrgizý máseleleri de egemendi bolyp sanalady.
EAEO barlyq organdarynyń negizgi mindeti - bizdiń elderimiz arasyndaǵy saýdadaǵy kedergilerdi joiý, sonyń ishinde taýarlarǵa biryńǵai standarttar men talaptardy engizý jáne úshinshi elderden ákelýdiń biryńǵai tariftik / tariftik emes sharalary men basqa da quraldaryn qoldaný.
Qarjy naryǵy men aqsha-nesie saiasaty saýda sharttaryna, taýarlar men qyzmetterdiń básekege qabilettiligine tikelei áser etetindigin eskere otyryp, biz olardy úilestirý úshin kelisilgen quraldardy qoldanýǵa kelistik.
Máselen, valiýtalyq qatynastardy retteýge jáne kelisilgen sharalaryn qabyldaýǵa kelisilgen tásilder týraly kelisimge qol qoiyldy. Budan bólek, birqatar basqa da kelisimder daiyndalýda (Baǵamdyq saiasat keńesinde, múshe memleketterdiń naryqtaryna brokerler men dilerlerdi qabyldaý týraly).
Jalpy, 2025 jylǵa qarai biz saqtandyrý jáne bank salalarynda, baǵaly qaǵazdar naryǵyn retteitin salalarda zańnamany jetildirýdi josparlap otyrmyz. Ol úshin Almatyda ornalasatyn organ qurý josparlanýda. Ol biryńǵai qarjy naryǵy sýbektileriniń tizilimin júrgizýmen, halyqaralyq uiymdarmen yntymaqtastyq jáne halyqaralyq standarttarǵa sáikes bolý úshin EAEO memleketteriniń zańnamasyn jetildirý boiynsha usynymdar ázirleýmen ainalysady.
Sonymen birge, bizdiń elderimizdiń ulttyq bankteri aqsha-nesie saiasatyn derbes júrgizedi, qarjylyq turaqtylyqty qamtamasyz etedi jáne qarjy naryǵynyń sýbektilerin ózdigimen qadaǵalaidy.
Men EAEO qarjy salasynda júieli túrde iske asyrylatyn negizgi jumystardy atadym. Taǵy da aitaiyn: Eýraziialyq odaq keńistiginde biryńǵai valiýtany engizý josparlanyp otyrǵan joq.
