QR SIM basshysy Muhtar Tileýberdi búgin Bakýde Túrki tildes memleketter yntymaqtastyq keńesiniń VII Sammiti qarsańynda ótken Túrki keńesi Syrtqy ister ministrleri keńesiniń otyrysyna qatysty, dep habarlaidy "Ult aqparat".
Kezdesýde ministrler Memleket basshylary keńesiniń otyrysynda qol qoiýy josparlanyp otyrǵan kún tártibindegi jobalar men qujattardy kelisti.
Kezdesý qorytyndylary boiynsha Bakýde ministrler Býdapesht qalasynda (Vengriia) 2019 jylǵy 19 qyrkúiekte ashylǵan Túrki Keńesi Ókildiginiń qyzmetin retteitin birneshe qujatqa qol qoidy.
Ministrlerdiń sheshimimen Vengriia Respýblikasyna Túrki mádenieti men murasy qorynyń janyndaǵy baqylaýshy mártebesi berildi.
Eske salaiyq, Túrki tildes memleketter yntymaqtastyq keńesi Qazaqstan Respýblikasynyń Tuńǵysh Prezidenti – Elbasy N.Á. Nazarbaevtyń bastamasymen 2009 jyly Nahychevan qalasynda (Ázerbaijan) qurylǵan. Túrki keńesiniń hatshylyǵy - Ystanbul (Túrkiia) qalasynda. 7-shi Sammittiń qorytyndylary boiynsha, Ózbekstan qosylǵannan keiin Keńeske múshe elder sany beske jetedi (Ázerbaijan, Qazaqstan, Qyrǵyzstan, Túrkiia, Ózbekstan).
