Ázerbaijan astanasynda Abai kúni atalyp ótildi, dep habarlaidy "Ult aqparat".
Qazaqstan elshisi S.Ábdikárimov óz sózinde Ázerbaijan basshylyǵyna Baký qalasynyń kósheleriniń birine shyǵarmashylyq murasy qazaq halqynyń rýhani bailyǵy sanalatyn, bolashaq urpaq úshin mańyzy zor Abai Qunanbaevtyń esimin bergeni úshin rizashylyǵyn bildirdi.
Sondai-aq, ol mereitoilyq jyldyń Prezident Qasym-Jomart Toqaevtyń «HHI ǵasyrdaǵy Abai jáne Qazaqstan» maqalasymen, sondai-aq halyqaralyq jáne ulttyq deńgeide uly qazaq aqyny jáne aǵartýshysynyń 175 jyldyq mereitoiyn atap ótý jónindegi tiisti jarlyǵymen bastalǵanyn atap ótti.
«Abai shyǵarmalaryna toqtala otyryp, biz onyń árdaiym ulttyń damýy men órkendeýine úles qosqanyn kóremiz. Ol qazaq halqynyń tynymsyz bilim alyp, damyǵanyn shyn júrekten tiledi. «Ǵylym tappai maqtanba», – dep, biikterge jetý úshin bilim alý qajettiligi týraly aitty. Abai qazaqtardy balalaryn mektepterge berýge shaqyrdy. Metsenattar tabylyp, Baianaýylda, Jetisýda mektepter ashyldy. Úzdik oqýshylar Máskeý men Sankt-Peterbýrgte bilimin jalǵastyrdy. Onyń shákirtteri qazaq halqynyń jerge quqyǵy úshin, ózin-ózi basqarýy úshin, ulttyq mádeniet pen dástúrdi, tildi saqtap qalýy úshin kúresken «Alash» partiiasynyń quramynda boldy», - dep atap ótti elshi.
«Búginde búkil túrki álemi qazaq halqynyń uly, búkil túrki áleminiń kórnekti qairatkeri, aqyn, aǵartýshy, kompozitor, qoǵam qairatkeri Abaidyń mereitoiyn atap ótýde. Onyń tulǵasy, bizge qaldyrǵan orasan zor murasy, shyǵarmalary qazaq halqynyń ulttyq sanasyna baǵa jetpes úles qosty, sondai-aq túrki áleminiń halyqtaryna da úlken áser etti. Búgingi Abaidyń eskertkish taqtasynyń ashylýyna jáne osy bastamaǵa úlken yqylaspen qoldaý bildiremin. Bul - qazaq jáne ázerbaijan halqynyń dostyǵynyń beinesi», - dedi Halyqaralyq túrki mádenieti men murasy qorynyń prezidenti G. Efendieva.
Abaidyń týǵan kúnine orai, qazaqstandyq diplomattar qarapaiym syilyq retinde memorialdyq taqtanyń janyna Baký turǵyndarynyń demalýyna arnalǵan oryndyqtar ornatty. Aktsiia Abaidyń óleńi men ánine jazylǵan «Jelsiz túnde jaryq ai» mýzykalyq shyǵarmasymen aiaqtaldy.
