Resei astanasynda «Pavlodardyń Máskeýdegi investitsiialyq kúnderi» biznes-forýmy bastaldy, dep habarlaidy "Ult aqparat" Pavlodar oblysy ákiminiń baspasóz qyzmetine silteme jasap.
Kórshi eldiń Saýda-ónerkásip palatasynyń kongress-ortalyǵynda ótken kezdesýde Pavlodar oblysynyń ákimi Bolat Baqaýov Reseidiń áleýetti investorlaryna jan-jaqty qoldaý kórsetýge ýáde berdi. Onyń ishinde investorlarǵa salyqtyq jeńildikter berý, keńseler, jumysshylarǵa áleýmettik qyzmetter usyný jáne taǵy da basqa jeńildikter bar.
Forýmdy ashqan Pavlodar oblysynyń ákimi bizdiń óńirdiń syrtqy saýda kóleminiń 40 paiyzdan astamy Resei Federatsiiasyna tiesili ekenin aitty. Máselen, 2018 jyly Pavlodar oblysy men Reseidiń óńirleri arasyndaǵy taýar ainalymy 1,8 mlrd dollardy quraǵan. Bul 2017 jyldyń kórsetkishinen 25 paiyzǵa joǵary. Atalǵan kórsetkishti arttyrý úshin Bolat Baqaýov reseilik biznesmenderdi Pavlodar oblysyna investitsiia quiýǵa shaqyrdy.
– Bizdiń óńir toǵyz joldyń torabynda ornalasqan. Dálirek aitsaq, joldardyń negizgi kúretamyry sanalatyn Ońtústik Sibir jáne Ortalyq Sibir temirjol jelilerinde oryn tepken. Pavlodar oblysy arqyly respýblikalyq mańyzdaǵy joldar ótedi. Áýe qatynasy, ózen qatynasy jolǵa qoiylǵan. Oblys geografiialyq turǵydan da tiimdi ornalasqan. Pavlodar oblysynan 500 shaqyrymdyq radiýste Qazaqstan men Reseidiń iri qalalary jatyr. Aimaqta sý men paidaly qazbalalar qory jetkilikti. Sondai-aq qazaqstandyq ferroqorytpanyń 65,2 paiyzy, benzinniń 46,3 paiyzy, glinozem men óńdelmegen aliýminiidiń 99,6 paiyzy bizdiń oblysta óndiriledi. Elimizde óndiriletin kómirdiń 60 paiyzy bizdiń óńirge tiesili, – dedi Bolat Baqaýov.
Pavlodar oblysynyń ákimi reseiliktermen birleske jobalardy qarjylandyrýǵa daiyn ekenin bildirdi. Sondai-aq óńirde kásipkerlerge árdaiy qoldaý kórsetýge daiyn ekenin jetkizdi. Budan bólek, memlekettik qoldaýdyń biryńǵai kepildendirilgen sharalary bar. Bul rette, investorlarǵa eki jylǵa qaitarymsyz negizde ofister beriledi. Investorlar jaldaityn qyzmetkerlerdiń otbasy múshelerin jumyspen, oqý oryndarymen qamtý da jolǵa qoiylǵan.
Máskeýdegi biznes-forýmǵa «Kazakh Invest» ulttyq kompaniiasynyń basshysy Baýyrjan Sartbaevtyń da qatysqanyn atap ótken jón. Ol reseilik kásipkerlerge Resei importtap otyrǵan Qazaqstanda óndiriletin taýarlardy oqshaýlaýdy usyndy.
– Bizdiń kompaniia áleýetti elderdiń tizimin jasady. Bul rette, biz úshin Resei Federatsiiasymen bailanys ornatý mańyzdy baǵyttyń biri. Reseilik investorlardy kóbinese Qazaqstandaǵy saiasi turaqtylyq, kásipkerlik qyzmetti retteitin zańnamalyq baza, salyqtyq jeńildikter jáne infraqurylymnyń damýy qyzyqtyrady. Búginde reseilik investorlarmen jalpy quny 4,8 mlrd dollardy quraityn jobalar boiynsha jumys júrgizilýde, – dedi Baýyrjan Sartbaev.
Forým qorytyndysy boiynsha birneshe ekijaqty kelisimge qol qoiý josparlanǵan. Sondai-aq Pavlodar oblysynyń ákimi birqatar reseilik biznesmen kelissózder júrgizbek.
