Buqaralyq aqparat quraldarynyń rólin, mártebesin jáne jaýapkershiligin nyǵaitý boiynsha birqatar mindet tur. Bul týraly Úkimet otyrysynda QR Aqparat jáne qoǵamdyq damý ministri Asqar Ýmarov málim etti, dep habarlaidy QazAqparat.
«Memleket basshysy «Jańa Qazaqstan: Jańarý jáne jańǵyrý joly» atty Joldaýynda buqaralyq aqparat quraldarynyń básekege qabilettiligin arttyrý jáne azamattyq qoǵam institýttarynyń rólin nyǵaitý boiynsha birqatar mindetter qoidy. Aqparat salasy boiynsha toqtalsaq, Memleket basshysy atap ótkendei, ashyq aqparattyq keńistik pen básekege qabiletti otandyq buqaralyq aqparat quraldaryn qurýǵa erekshe nazar aýdarý qajet. Búgingi tańda ministrlik aldynda buqaralyq aqparat quraldarynyń rólin, mártebesin jáne jaýapkershiligin nyǵaitý boiynsha birqatar mindet tur», - dedi A.Ýmarov.
Osyǵan bailanysty, ministrliktiń jumysy, eń aldymen, kelesi mindetterdi sheshýge baǵyttalatyn bolady:
Birinshiden, qoǵamnyń suranysy men memleket múddesin eskere otyryp, buqaralyq aqparat quraldary týraly zańy qaita qaralatyn bolady. Bul protsess keń qoǵamdyq jáne saraptamalyq talqylaý negizinde júzege asyrylatynyn atap ótý mańyzdy. Osylaisha, jýrnalistik qoǵamdastyqtyń aǵymdaǵy zańnamaǵa qatysty barlyq ózekti máseleleri eskeriletin bolady.
Ekinshiden, azamattyq baqylaýdy júzege asyratyn «tórtinshi bilik» retinde áreket etetin buqaralyq aqparat quraldary úshin ashyq básekelestik orta damityn bolady.
«Úshinshiden, memlekettik aqparattyq jumys boiynsha jańa tásilder ázirlenetin bolady», - dedi ministr.
