Mozambiktiń soltústiginde radikaldy dini toptarmen qaqtyǵysta Reseidiń bes jaldamaly sarbazy qaza tapty dep habarlady qupiia derekkózge súiengen Carta de Mocambique basylymy. Sarbazdar "Vagner" jaldamaly áskeri tobynda qyzmet etken.
Basylym dereginshe, 27 qazanda Kabý-Delgadý provintsiiasynda Resei jaldamalylary jergilikti sodyrlardyń qorshaýynda qalǵan. Qaqtyǵys kezinde úkimet áskeriniń 20 sarbazy jáne Reseidiń bes jaldamaly sarbazy qaza tapqan.
Olardyń súiekteri Mýeda qalasyndaǵy aýrýhanaǵa jetkizilgen. Resei biligi bul aqparatqa bailanysty túsinikteme bermedi.
Mozambiktiń soltústiginde úkimet kúshteri men dini radikaldy toptar arasynda 2017 jyldan beri qaqtyǵys jalǵasyp keledi. Resei men Mozambik 2015 jyly áskeri-tehnika boiynsha áriptestik týraly kelisimge qol qoiǵan. Eki memleket arasynda áskeri áriptestik ornatý týraly 2016 jyly qol qoiylǵan kelisim de bar. Alaida osy ýaqytqa deiin Mozambikke resmi túrde áskeriler jiberilmedi.
Qazan aiynyń basynda Carta de Mocambique "Vagner" jaldamaly áskeri tobynda qyzmet atqarǵan bir sarbazdyń sodyrlar shabýyly kezinde qaza tapqanyn habarlaǵan. Bul aqparatqa bailanysty túsinikteme bergen Resei prezidentiniń baspasóz hatshysy Dmitrii Peskov "Mozambikte Resei áskeri joq" degen.
Resei 2014 jyldan beri Afrikanyń 20-dan astam elimen áskeri áriptestik týraly kelisim jasasqan. Olardyń arasynda OAR, Mali, Kongo, Rýanda, Madagaskar bar. Ortalyq Afrika respýblikasynda "Vagner" toby jergilikti sarbazdardy daiarlaýǵa atsalysady.
