Soltústik Koreia basshysy Kim Chen Yn Phenianda Ońtústik Koreia delegatsiiasymen "ashyq, shynaiy áńgime" bolǵanyn aityp, Ońtústik Koreiamen birigý týraly kelissózdi "ilgeriletý nieti berik" ekenin málimdedi. Kim Chen Yn Ońtústik Koreia prezidenti Mýn Chje In jibergen delegatsiiamen 5 naýryzda kezdesti.
Soltústik Koreia memlekettik aqparat quraldarynyń habarlaýynsha, Kim Chen Yn tórt saǵatqa sozylǵan keshki as kezinde "ulttyq birigýdiń jańa tarihyn jazý" nieti baryn bildirdi.
Biraq Seýl men Vashington Kim Chen Ynnyń bul sózderiniń shynaiylyǵyna kúmán keltiredi. AQSh pen Ońtústik Koreia biligi ókilderi Phenian Ońtústik Koreiamen birigý týraly bastamasyn halyqaralyq qaýymdastyq salǵan sanktsiiany jeńildetý úshin paidalanýy múmkin dep topshylaidy.
Seýl men Phenian arasynda yqylasty kelissóz eki el aqpanda Phenchhanda ótken qysqy olimpiada oiyndaryna Soltústik Koreiany qatystyrýǵa kelisken soń bastalǵan. Soltústik Koreia memlekettik aqparat quraldarynyń habarlaýynsha, Kim Chen Yn Mýn Chje Inmen joǵary deńgeide kezdesý josparlaýdyń "naqty qadamdaryn" jasaǵysy keletinin aitqan. Ol sonymen qatar kelissózdiń maqsaty "iadrolyq qarýsyzdaný" bolýy tiis ekenin jetkizgen.
