Izrail tarabynyń soqqysynan keiin Gaza sektorynda koronavirýs anyqtaityn jalǵyz zerthana isten shyqty. Bul týraly The Times of Israel basylymy jazdy.
HAMAS ókilderine súiengen basylymnyń jazýynsha, soqqynyń saldarynan Gaza sektoryndaǵy Ál-Rimal klinikasy ishinara qiraǵan. Zerthana osy klinikada ornalasqan. HAMAS-tyń resmi ókilderiniń aitýynsha, densaýlyq saqtaý ministrligi men Qyzyl Ai uiymynyń Katardaǵy basqarmasy ǵimaraty da búlingen.
Gazanyń densaýlyq saqtaý vitse-ministri Iýsef Ábý ál-Rish aqparat quraldaryna ministrlik qyzmetkerleriniń jaralanǵanyn, keibiriniń jaǵdaiy aýyr ekenin habarlady.
Dúniejúzilik densaýlyq saqtaý uiymynyń (DDSU) málimetinshe, Gaza sektorynda koronavirýs testi oń shyqqan azamattar óte kóp (28 paiyzy), bul kórsetkish boiynsha Gaza álemde aldyńǵy oryndarda tur. Munda aýrýhanalarda oryn joq. The Times of Israel basylymynyń jazýynsha, Gazada 103 myń adamnyń PTR-testi oń shyqqan, koronavirýstan 930-dan astam adam qaitys bolǵan.
Palestina aqparat quraldary seisenbi kúni Izrail qorǵanys armiiasynyń Gaza sektoryna jappai soqqy bergenin habarlady. HAMAS-tyń jaǵalaýdaǵy kemeleri de atqylaýǵa ushyraǵan.
17 mamyrda Washington Post AQSh-tyń Izrailge 735 mln dollarǵa joǵary dáldikpen tigizetin qarý satýdy maquldaǵanyn habarlaǵan.
Aimaqta jaǵdai ýshyqqaly beri (10 mamyr) Palestina biliginiń málimetinshe, Gaza sektorynda 192 adam qaza bolǵan, 58-i – bala. Izrail áskeri HAMAS-tyń áskeri nysandaryn turǵyn úilermen qatar salyp, beibit turǵyndardy "qalqan" retinde paidalanyp otyr dep aiyptaǵan.
