Qytaidy koronavirýs týraly shynaiy derekti jasyrdy dep aiyptaǵan Eýroodaqtyń esebi Pekin qysymynan keiin ózgeriske ushyrady, dep jazdy 25 sáýirde New York Times jáne Reuters agenttigi.
Jýrnalisterdiń sózine qaraǵanda, Qytai baiandamanyń jariialanýyna kedergi jasaýǵa talpynǵan. Al keiinirek baiandamadaǵy Pekindi synaǵan keibir abzatstar alynyp tastalǵan, ózgertilgen nemese aýystyrylǵan.
20 sáýirde jariialanýy tiis bolǵan baiandamanyń túpnusqasy Qytai, Iran jáne Reseidiń koronavirýs indeti týraly aqparatty úsh jaqtan barynsha burmalaǵanyna meńzeidi.
New York Times jazýynsha, qujat túpnusqasynda Qytai indetke bailanysty jaýapkershilikti ózinen syrǵytyp, halyqaralyq bedelin jaqsartý úshin "jalǵan aqparat taratý boiynsha ǵalamdyq kampaniianyń bastaýynda qala beredi" dep jazylǵan. Buǵan qosa, Pekin koronavirýs úshin - AQSh áskerilerin, DDSU jetekshisiniń "ar-namysyna tigeni úshin" frantsýz saiasatkerlerin aiyptaýǵa tyrysqan.
Alaida baiandama 24 sáýirde keshigip jariialandy. Onda Qytaidyń "jalǵan aqparat taratý boiynsha ǵalamdyq kampaniianyń bastaýynda turǵany" týraly tujyrym jáne frantsýz saiasatkerlerin aiyptaýy týraly bólik joǵalyp ketken.
New York Times jazýynsha, qujattyń túpnusqasynda "jalǵan aqparat" kampaniiasynyń artynda Resei men Qytai tur degen tujyrym jasalsa, keshigip shyqqan baiandamada olar "ózgelermen" aralasyp ketken.
Eýropa úkimetteri arasynda taraǵan ishki baiandamadaǵy málimetke sáikes, "túrli úkimettegi resmi jáne memleket qoldaityn derekkózder (onyń ishinde Resei men Qytai da bar) Eýroodaq pen odan tys aýmaqta koronavirýs indeti týraly konspirologiialyq áńgimeler men jalǵan aqparatty keńinen taratqan.
New York Times jáne Reuters jazýynsha, Eýropa sheneýnikterin baiandamany keshiktirdi, ózgertti dep aiyptaǵan maqalalar kóptegen derekkózderge, ishki qujattarǵa súienip jazylǵan.
