Túrikmenstan prezidenti Ǵurbanǵuly Berdimuhamedovtiń uly, vitse-premer Serdar Berdimuhamedov biyl 12 naýryzda ótetin prezident sailaýyna túskisi keletinin jariialady. Bul jóninde Salamnews saityna súiengen Reuters agenttigi habarlady.
Bul habarǵa qaraǵanda, Serdar Berdimuhamedovtiń kandidatýrasyn Túrikmenstan biligindegi Demokratiialyq partiia usynǵan. "Ǵurbanǵuly Berdimuhamedov osy partiia atynan úsh márte prezident sailaýyna qatysyp, úsheýinde de "jeńip shyqqan edi" dep jazady Azattyqtyń Túrikmen redaktsiiasy.
Túrikmenstannyń sailaý jáne referendým jónindegi ortalyq komissiiasy dúisenbi kúni kezekten tys prezident sailaýynyń kampaniiasy bastalǵanyn habarlap, resmi tirkeýde turǵan úsh saiasi partiianyń kandidat usynýyna ruqsat bergen. Úsh kún buryn Túrikmenstandy 15 jyldan beri avtoritar jolmen basqaryp kele jatqan Ǵurbanǵuly Berdimuhamedov otstavkaǵa ketetin oiy bar ekenin ańǵartqan.
Jerasty shikizattaryna óte bai, biraq saiasi jáne ekonomikalyq turǵydan meilinshe oqshaýlanǵan bul elde Demokratiialyq partiiadan ózge Agrarlyq partiia jáne Túrikmenstan kásipkerleri men ónerkásip partiiasy bar. Úsheýi de Berdimuhamedovti qoldaidy, shynaiy oppozitsiialyq partiia joq.
Prezident sailaýy 12 aqpanda jariialandy. Odan nebári bir kún buryn ǵana prezident Berdimuhamedov "jastarǵa jol berý úshin otstavkaǵa ketkisi keletinin" parlament joǵarǵy palatasynyń kezekten tys otyrysynda aitqan edi.
Túrikmenstandaǵy saiasi jaǵdaidy baqylaýshylar qazirgi prezident biligin ulyna tapsyrmaqshy dep boljaidy. Mundai joramaldar aityla bastaǵanyna bir jyldan asqan. 2021 jyldyń qyrkúiegine 40 jasqa tolǵan Serdar endi Túrikmenstan konstitýtsiiasy boiynsha prezidenttikke túse alady.
Ǵurbanǵuly Berdimuhamedov 2007 jyly avtokrat prezident Saparmurat Niiazov qaitys bolǵannan keiin bilikke kelgen.
