QR Aqparat jáne qoǵamdyq damý ministrliginiń qoldaýymenbuqaralyq aqparat quraldary qyzmetkerleriniń kúnine orai maýsymnyń 27-si kúni Nur-Sultan qalasynda shaǵyn fýtboldan bilikti qalamger, qazaq sport jýrnalistikasynyń negizin qalaýshy Seidahmet Berdiquldy eske alýǵa arnalǵan respýblikalyq týrnir qaita jandanady, dep habarlaidy "Ult aqparat".
Alǵash ret bairaǵyn 1994 jyly kótergen týrnir barsha BAQ ókilderiniń taǵatsyzdana kútetin dop dodasyna ainaldy. Alaida, karantindik shekteýlerge bailanysty dástúrli jarys uiymdastyrylmai qalǵan bolatyn.
Osy oraida Seidahmet Berdiquldyń rýhyn ardaqtaý jáne otandyq BAQ ókilderiniń basyn qosyp, ózara yntymaqtastyqty arttyrý maqsatynda QR Aqparat jáne qoǵamdyq damý ministrligi týrnirdi «BAQ liga» qoǵamdyq qorymen qaita jandandyryp otyr. Týrnir 27 maýsymda BAQ qyzmetkerleri kúni qarsańynda Nur-Sultan qalasynda ótedi.
QR Aqparat jáne qoǵamdyq damý ministri A.Ǵ. Balaeva «Dene shynyqtyrý ár adamnyń ómirinde mańyzdy ról atqarady jáne BAQ qyzmetkerleri de erekshelik emes. Atalǵan sharamen biz aqparat salasynyń damýyna úlken úlesin qosqan belgili áriptesterimizge qurmet kórsetemiz. Sondai-aq, ol óskeleń urpaq úshin úlgi bolady dep senemin» - dei otyryp, respýblikalyq jáne óńirlik BAQ-tardy týrnirge belsendi qatysýǵa shaqyrady.
Aita keteiik, Seidahmet Berdiqul (1933-1994) – Almaty oblysy, Jambyl aýdanyndadaǵy Qarakastek qystaǵynda dúniege kelgen. 1956 jyly QazMÝ-diń jýrnalistika fakýltetin bitirgen. 1965-1970 jyldary «Qazaqstan pioneriniń» redaktory, 1970-1986 jyldary «Leninshil jas» (qazirgi «Jas alash») gazetiniń redaktory, 1986-1994 jyldary «Jalyn», «Balaýsa» baspalarynyń direktory boldy, qazaq sporty janrynyń negizin qalady. 1960 jyldan bastap ádebi-kórkem shyǵarmalar jazýmen ainalysqan. Orys tilinde «Ostryi klinok» jinaǵy jaryq kórdi. Birtalai týyndylary týysqan halyqtar tilinde aýdaryldy. «Qurmet Belgisi» ordenimen, medaldarmen marapattalǵan.
Shaǵyn fýtboldan Seidahmet Berdiquldyń alǵashqy týrniri qalamger dúnieden ótkennen keiin 1994 jyly uiymdastyryldy. Biyl 23-shi ret bairaǵyn jelbiretpek.
Týrnirge qatysatyn komandalar birneshe topqa (árbirinde 4 komandadan) bólinedi. Ár toptan eki úzdik komanda kelesi kezeńge shyǵady, ári qarai plei-off básekesine ulasady.
