AQSh Iranǵa sanktsiia salý máselesinde jeńildik jasaýǵa daiyn. Bul týraly habarlaǵan Bloomberg agenttigi derekkóziniń málimetinshe, Vashington arasynda Qytai, Japoniia, Ońtústik Koreia men Úndistan bar - barlyǵy segiz memlekettiń Irannan munai satyp alýyna qarsy emes. Munyń esesine, segiz el munai importy kólemin azaitýy tiis. Sonda ǵana munai baǵasyn qymbattatpaýǵa bolady.
AQSh Memlekettik departamenti men Qarjy ministrligi BAQ-taǵy Iranǵa salynatyn sanktsiiany jeńildetýge qatysty aqparatqa kommentarii bermedi. Bloomberg-tiń málimetinshe, sanktsiia sharttarynyń ózgeretini týraly resmi túrde qarashanyń 2-i kúni jariia bolady. Agenttik jeńildik ýaqytsha ǵana jasalatynyn aitady. AQSh jeńildik jasalǵan elder keleshekte Irannan munai satyp alýdy qysqartady dep úmittenedi.
Vashington biyl mamyrda Batys elderi Iranmen 2015 jyly jasaǵan iadrolyq baǵdarlamany damytpaý kelisiminen shyǵyp ketken soń burynǵy sanktsiialardy qaita salyp jatyr.
AQSh pen Izrail biligi prezident Barak Obama kezinde jasalǵan iadrolyq kelisim irandyqtardyń iadrolyq qarý jasaýǵa qupiia túrde qarjy jinaýyna múmkindik týdyrdy dep biledi. Tegeran bul aiypty teristeidi. Eýropa Odaǵy Iranmen jasalǵan kelisimdi qoldap, AQSh-tyń óz betinshe salǵan sanktsiiasynan ainalyp ótý sharalaryn daiyndaitynyn málimdegen. Resei men Qytai da Iranmen iadrolyq kelisimdi saqtap qalýdy qoldaidy.
AQSh-tyń Irannyń munai salasyna salǵan sanktsiialary qarashanyń 5-inde kúshine enedi.
