Týrizm jáne sport ministrligi Baiqońyr ǵarysh ailaǵy kesheniniń týristik áleýetin damytý jumystaryn jalǵastyryp jatyr. Osy maqsatta QR Premer-Ministriniń tapsyrmasymen Baiqońyrda týrizmdi damytýdyń 2030 jylǵa deiingi tujyrymdamasy bekitildi, dep habarlaidy ult.kz.
Vedomstvonyń málimetinshe, qujat halyqaralyq deńgeide básekege qabiletti týristik ónim qalyptastyryp, salanyń turaqty damýyna jaǵdai jasaýǵa baǵyttalǵan.
Tujyrymdama aiasynda sheteldik týrister úshin ruqsat alý rásimderi jeńildetildi. Qazir qajetti qujattardy rásimdeý merzimi 10 kúnge deiin qysqartylǵan. Bul sheteldik qonaqtardyń Baiqońyrǵa kelýin jeńildetip, ǵarysh apparattarynyń ushyrylymdaryn tamashalaýǵa arnalǵan týristik baǵdarlamalardyń damýyna serpin bermek.
Sonymen qatar Qazaqstannyń qaramaǵyna birqatar mańyzdy nysandardyń berilýi jańa múmkindikter ashyp otyr. Olardyń qatarynda Gagarin ushý alańy, montajdaý-janarmai quiý kesheni jáne dinamikalyq synaqtar stendi bar.
Mamandardyń aitýynsha, bul nysandar ǵylymǵa, tehnologiiaǵa jáne ǵarysh tarihyna qyzyǵatyn týrister úshin erekshe qyzyǵýshylyq týdyrady. Bolashaqta olar álemniń ár túkpirinen keletin saiahatshylardyń mańyzdy tartymdylyq ortalyǵyna ainalýy múmkin.
Qazirgi ýaqytta atalǵan nysandardy jańǵyrtýǵa jáne zamanaýi týristik infraqurylym qurýǵa múddeli investorlarǵa arnalǵan investitsiialyq usynystar ázirlengen.
Sondai-aq ministrlik ushyrylymdar arasyndaǵy kezeńde oqiǵaly týrizmdi damytýǵa basymdyq berip otyr. Bul bastama jyl boiy turaqty týristik aǵyn qalyptastyryp, keshenniń qoldanystaǵy infraqurylymyn tiimdi paidalanýǵa múmkindik beredi.
Vedomstvonyń pikirinshe, Baiqońyrdy álemdik deńgeidegi týristik ortalyqqa ainaldyrý Qazaqstannyń týristik salasyn ártaraptandyrýǵa, halyqaralyq týristik naryqtaǵy pozitsiiasyn nyǵaitýǵa jáne eldiń týristik tartymdylyǵyn arttyrýǵa yqpal etedi.
