Qazaqstandyq kásipker, BelnTech tehnologiialyq kompaniiasynyń basshysy Baǵdat Mýsin jas baǵdarlamashylardy indýstriialyq startaptardy kóbeitýge shaqyrdy, dep habarlaidy QazAqparat tilshisi.
«Amerikadaǵy tanymal Silikon alqabynda eki ai boldym jáne álemniń chat, bot, áleýmettik jeli syndy jeńil dúnielerden alshaqtap bara jatqanyn túsindim. Olardyń nebir túrleri shyǵyp jáne zamany ótip ketti, al bizdiń baǵdarlamashylar áli de oǵan qyzyǵýshylyq tanytyp keledi. Onyń ústine álemde usaq-túiek startaptardy satyp alatyn iri oiynshylar paida boldy. Kerisinshe, indýstriialyq startaptar óte az jáne osy baǵytqa kóbirek mán bergen jón», - dep atap ótti Baǵdat Mýsin Astanada Qazaqstan Technology forýmynda.
Onyń aitýynsha, Qazaqstan ekonomikasynyń munai, aýyl sharýashylyǵy syndy shikizattyq tirekteri bar jáne bul - indýstriialyq startaptardy damytý úshin úlken múmkindik.
«Bir qyzyǵy, Qazaqstandaǵy startaptar e-KSK syndy memlekettik máselelerdi sheshýge arnalǵan. Jas baǵdarlamashylardy indýstriiaǵa kóńil bólýge shaqyramyn. Silikon alqabynda jasandy intellekt pen úlken derekterdi biletinder emes, indýstriiada jumys istegen, naqty bir máseleniń sheshimin usynǵan mamandar joǵary baǵalanady. Iaǵni, qazirgi ýaqytta ýniversitetti bitirip, kezekti bir áleýmettik jeli nemese e-commerce jasaýdyń qajeti joq. Naqty fizika-tehnika baǵytynda oqyp, aýyl sharýashylyǵyna baryp, másele sheshkender az. Ondaǵy básekelestik orta áli bos. Osy baǵytta indýstriiaǵa qajetti paidaly startaptardy jasaý kerek», - dep óz sózin jalǵastyrdy B. Mýsin.
Sonymen birge, B. Mýsin kásipkerlerdi Qazaqstanda ǵana emes, álemniń kez kelgen buryshynda qoldaý qajettigin eske saldy.
«Silikon alqabynda jumys istep júrgen, biikke talpynyp júrgen qazaqstandyqtar bar. Bireýiniń joly bolady, endi bireýiniń taýy shaǵylady. Kásipkerlerge qoldaý bildirýdi oilaǵanda tek qana Qazaqstandaǵy kásipkerlerdi oilaimyz. Sheteldik naryqta júrgen qazaqstandyqtardy da umytpaý kerek. Ol úshin Silikon alqabynda shetelde jumys istep júrgen qazaqstandyq innovatorlarǵa qoldaý kórsetetin Digital elshilik ashý kerek», - dedi Baǵdat Mýsin.
Silikon alqaby - AQSh Kaliforniia shtatynyń ońtústiginde ornalasqan joǵary tehnologiialar indýstriiasynyń ortalyǵy retinde tanylǵan aýdan. Silikon alqabynda kompiýterler jáne onyń jabdyqtary, ásirese mikroprotsessorlar, baǵdarlamalyq jasaqtamalar, mobildik bailanys qurylǵylaryn óndiretin kompaniialar kóptep ornalasqan.
