Qazaqstan Prezidentiniń keńesshisi Baǵdat Mýsin tsifrlyq bilim berý júiesin jolǵa qoiý úshin Bilim jáne ǵylym ministrliginiń ózinde Digital office bolýy kerektigin málim etti, dep habarlaidy QazAqparat.
«Sabaq berýdegi videokontent týraly aitar bolsaq, videostrimingtiń ózinen góri qazir kóbi grafikalyq kontentti qolai kóredi. Grafikalyq kontenttiń ózi – rastrly jáne vektorly keskinderge bólinedi. «Macromedia Flash» baǵdarlamasymen jumys isteitin maman vektorly mýltimediialyq faildardyń, IT tilimen aitqanda, salmaǵy jeńil ekenin túsinedi. Sol sebepti bul salaǵa naqty mamandy otyrǵyzyp, internet kótere almaityn kontentpen jumys istemeý kerek. Bilim jáne ǵylym ministrliginiń ózinde Digital office bolýy kerek dep esepteimin. Ol keńse muǵalimderdi tehnikamen qamtamasyz etýdi emes, tsifrlyq álemniń bilim berý salasyna qalai áser etetinin tap basyp bile alatyn, transformatsiiany oilaityndai mekeme bolýy tiis», - dedi Baǵdat Mýsin qashyqtan oqytý tehnologiialaryn qoldanýdyń problemalary talqylanǵan onlain rejimdegi kezdesýde.
Prezidenttiń keńesshisi, sonymen qatar, Bilim jáne ǵylym ministrligine suraǵy baryn jetkizdi.
«Biz búgingi kúni «Kundelik» júiesin jolǵa qoiyp alǵanymyzben, nelikten osyǵan deiin synyp jýrnalynan bas tartpaǵanbyz. Iaǵni «Kundelik» júiesimen birge jýrnaldy da toltyryp júrgenbiz. Erteńgi kúnimizdi oilap, úreide boldyq. Batylyraq bolyp, jýrnaldardan da, qaǵaz esepterden de bas tartý kerek. Muǵalimderdiń áleýmettik jelide sabaq beremiz be, joq álde esep berip júre beremiz be degen syńaidaǵy ýájderi men daýlaryn talai kórdik. Sol sebepti qazirgi tańda qolda bardy barynsha paidalaný kerek», - dedi ol.
