Tsifrlyq damý, innovatsiialar jáne aeroǵarysh ónerkásibi ministri Baǵdat Mýsin Qazaqstanǵa ǵana tiesili halyqaralyq telefon kody berilgenin aityp, qýanyshty jańalyqpen bólisti.
Budan bylai Qazaqstanǵa +997 halyqaralyq telefon kody bekitilmek. Jaǵymdy jańalyqty ministr Facebook paraqshasynda jazdy.
"Jaqsy jańalyq! BUU janyndaǵy Halyqaralyq elektr bailanys odaǵy Qazaqstanǵa jańa +997 def kodyn belgiledi. Endi bizdiń elden basqa memleketke qońyraý shalǵanda, sheteldikterdiń telefonynda Qazaqstan degen jazý shyǵady. Sondai-aq, halyqaralyq deńgeidegi tsifrly servisterdi qoldanǵanda da, barlyq jerde Qazaqstan degen signal shyǵady", - deidi Baǵdat Mýsin.
Ministrdiń sózinshe, KSRO taraǵanda +7 halyqaralyq telefon kody eki elge (Resei federatsiiasy - red.) birdei bekitilgen.
"Biz Qazaqstanǵa ǵana tiesili halyqaralyq kodqa qol jetkizý úshin byltyrdan beri telekommýnikatsiia salasyndaǵy kompaniialarmen birge jan-jaqty jumys júrgizip kelemiz. Osy kelissózderdiń nátijesinde bizdiń elge derbes +997 kody bekitildi! Qazir tiisti qujattar rásimdelip, jańa kodqa kóshý boiynsha is-sharalar atqarylyp jatyr", - deidi ol.
Ministrlik josparyna sáikes, Qazaqstan 2023 jyldyń qańtarynan bastap jańa ulttyq kodqa kóshedi. Sonymen qatar, taǵaiyndalǵan sátten bastap jańa jáne eski kodtardy eki jyl qatar qoldanýǵa bolady. Tolyq aýysý 2025 jyldan bastalady dep kútiledi.
