Búgin Májilistegi Úkimet saǵatynda QR Tsifrlyq damý, innovatsiialar jáne aeroǵarysh ónerkásibi ministri Baǵdat Mýsin elimizde jańa +997 nómirli kodyna qatysty túsinik berdi, dep habarlaidy QazAqparat.
Májilistegi Úkimet saǵatynda depýtat Edil Jańbyrshin Qazaqstannyń halyqaralyq telefon kodyna qatysty suraq qoidy.
«+7 telefon kodynyń aimaǵynda tek Resei ǵana emes, Qazaqstan da kiredi. Nelikten osy kodtan kenetten bas tartý kerek dep sheshim qabyldandy? Ekinshiden, biz ondaǵan halyqaralyq kelisimge qol qoiyp, ratifikatsiialap otyrmyz. Bul rette telefon kodyna qatysty memleketaralyq qujatqa qol qoiýǵa ne kedergi bolyp otyr? Úshinshiden, qońyraý shalǵan kezde bizdiń elde durys identifikatsiialaý da kelisimmen bolady. Tehnikalyq turǵyda muny jasaý ońai. Nelikten bul jasalmaǵan? Toq eteri, Qazaqstan +7 telefon kody aimaǵynda qala ma?», - dedi depýtat Tsifrlyq damý ministrine qarata qoiǵan suraǵynda.
Óz kezeginde Baǵdat Mýsin bul suraqqa bailanysty tiisti kelisimsharttyń 11-babyn oqyp berdi.
«Kelisimniń erejelerine sáikes, taraptardyń kez kelgeni onyń qoldanysyn toqtatý nieti týraly habarlamany aldyn ala jibere otyryp, ony birjaqty tártippen buza alady, 6 ai buryn. Iaǵni 6 ai buryn bizge «+7-den shyq» degen máseleni qozǵaý – osyǵan alyp keledi. Bizge shyq dep bir hatpen ǵana aita alady. Eshqandai memleketaralyq ratifikatsiiadan ótkizý qajet emes. Resei tarapynan osy hatty alsaq, +7-den shyǵarý múmkindigi bar. 2006 jyly osyndai vedomstvoaralyq qujatqa qol qoiǵan edik. Qazaqstannyń bailanys agenttigi men Resei tarapynan bailanys ministrligi osyndai kelisimge keldi», - dedi ministr.
Vedomstvo basshysy +7-den basqa kodqa aýysa salý jarty jylda júzege asyrylatyn ońai sharýa emes ekenin aitty.
«Jarty jylda aýysyp ketý – ol óte kúrdeli suraqtardyń biri. Sondyqtan birinshi baryp, BUU janyndaǵy halyqaralyq elektr bailanys odaǵynan bizdiń jeke kodymyzdy aldym. Endi Resei tarapymen kelissóz júrgizgende, bul kod bizde bar. Sondyqtan memleket rezervindegi kodtyń bolýy – bizge óte qajet. Ol Resei tarapymen kelisimshart arqyly emes, BUU-dan berilgen kod», - dedi Mýsin.
«+7-niń quqyqtyq tetikteri jaǵynan qarap jatyrmyz. Sondyqtan kelissózderdi júrgizý úshin osyndai máseleni qozǵadyq. Ratifikatsiiadan ótkizý úshin bastapqyda Resei tarapymen kelisip alýymyz kerekpiz. Aldaǵy ýaqytta kelissózder júrgiziledi», - dep túsindirdi ministr.
Budan buryn habarlanǵandai, biyl qyrkúiek aiynda B. Mýsin BUU janyndaǵy halyqaralyq elektr bailanys odaǵy Qazaqstanǵa jańa +997 kodyn belgilegenin aitty.
Endi bizdiń elden basqa memleketke qońyraý shalǵanda, sheteldikterdiń telefonynda Qazaqstan degen jazý shyǵady. Sondai-aq halyqaralyq deńgeidegi tsifrly servisterdi qoldanǵanda da, barlyq jerde Qazaqstan degen signal shyǵady.
«Kezinde KSRO taraǵanda, +7 halyqaralyq telefon kody eki elge birdei bekitilgen bolatyn. Biz Qazaqstanǵa ǵana tiesili halyqaralyq kodqa qol jetkizý úshin byltyrdan beri telekommýnikatsiia salasyndaǵy kompaniialarmen birge jan-jaqty jumys júrgizip kelemiz. Osy kelissózderdiń nátijesinde bizdiń elge derbes +997 kody bekitildi», - deidi vedomstvo basshysy.
