Almaty oblysy ákiminiń orynbasary Baǵdat Mánizorovqa taǵylǵan aiyp alyndy. Bul aqparatty Baǵdat Mánizorovtyń advokaty Almas Demesinovke siltei otyryp tengrinews.kz aqparat agenttigi taratty.
28 qazanda Bas prokýratýra Baǵdat Mánizorovtyń ústinen qozǵalǵan qylmystyq isti toqtatqany jaily qujattyń kóshirmesi internette keshe paida bolǵan. Qujatta Mánizorovqa taǵylǵan aiyptar qylmystyq quqyq buzýshylyq joqtyǵyna bailanysty zańsyz sanalǵany jazylǵan.
Qazan aiynyń basynda sybailas jemqorlyqqa qarsy is-qimyl agenttigi Almaty oblysy ákiminiń orynbasary Baǵdat Mánizorovtyń "Alaiaqtyq" baby boiynsha (Qylmystyq kodekstiń 190-bap, 4-bólim 2-tarmaǵy) kúdikke ilingenin, tergeý júrip jatqanyn habarlaǵan.
Mánizorovtiń ústinen qozǵalǵan is jaiynda aqparat quraldarynda túrli máimetter tarady. "Vremia" basylymy Mánizorovtyń ústinen bastapqyda "para alý" baby boiynsha qylmystyq is qozǵalyp, keiinnen "alaiaqtyqqa" aýystyrylǵanyn jariialady. Sheneýnik kómekshisi jýrnalisterge Mánizorovtyń tergeý izoliatorynda emes, aýrýhanada ekenin aitqan. Al, sybailas jemqorlyqqa qarsy is-qimyl agenttigi "Mánizorovty úiqamaqqa aýystyrý jaily ótinish jasalǵanyn" habarlaǵan edi.
57 jastaǵy Baǵdat Mánizorov Almaty oblysy ákiminiń orynbasary qyzmetine biyl 10 shildede taǵaiyndalǵan. Odan buryn Almaty qalalyq memlekettik sáýlet-qurylys baqylaý basqarmasyn eki jyl basqardy. 2008-2017 jyldary Almaty qalasy Alataý aýdanynyń ákimi boldy.
