الماتى وبلىسى ەكٸمٸنٸڭ ورىنباسارى باعدات مەنٸزوروۆقا تاعىلعان ايىپ الىندى. بۇل اقپاراتتى باعدات مەنٸزوروۆتىڭ ادۆوكاتى الماس دەمەسٸنوۆكە سٸلتەي وتىرىپ tengrinews.kz اقپارات اگەنتتٸگٸ تاراتتى.
28 قازاندا باس پروكۋراتۋرا باعدات مەنٸزوروۆتىڭ ٷستٸنەن قوزعالعان قىلمىستىق ٸستٸ توقتاتقانى جايلى قۇجاتتىڭ كٶشٸرمەسٸ ينتەرنەتتە كەشە پايدا بولعان. قۇجاتتا مەنٸزوروۆقا تاعىلعان ايىپتار قىلمىستىق قۇقىق بۇزۋشىلىق جوقتىعىنا بايلانىستى زاڭسىز سانالعانى جازىلعان.
قازان ايىنىڭ باسىندا سىبايلاس جەمقورلىققا قارسى ٸس-قيمىل اگەنتتٸگٸ الماتى وبلىسى ەكٸمٸنٸڭ ورىنباسارى باعدات مەنٸزوروۆتىڭ "الاياقتىق" بابى بويىنشا (قىلمىستىق كودەكستٸڭ 190-باپ, 4-بٶلٸم 2-تارماعى) كٷدٸككە ٸلٸنگەنٸن, تەرگەۋ جٷرٸپ جاتقانىن حابارلاعان.
مەنٸزوروۆتٸڭ ٷستٸنەن قوزعالعان ٸس جايىندا اقپارات قۇرالدارىندا تٷرلٸ مەٸمەتتەر تارادى. "ۆرەميا" باسىلىمى مەنٸزوروۆتىڭ ٷستٸنەن باستاپقىدا "پارا الۋ" بابى بويىنشا قىلمىستىق ٸس قوزعالىپ, كەيٸننەن "الاياقتىققا" اۋىستىرىلعانىن جارييالادى. شەنەۋنٸك كٶمەكشٸسٸ جۋرناليستەرگە مەنٸزوروۆتىڭ تەرگەۋ يزولياتورىندا ەمەس, اۋرۋحانادا ەكەنٸن ايتقان. ال, سىبايلاس جەمقورلىققا قارسى ٸس-قيمىل اگەنتتٸگٸ "مەنٸزوروۆتى ٷيقاماققا اۋىستىرۋ جايلى ٶتٸنٸش جاسالعانىن" حابارلاعان ەدٸ.
57 جاستاعى باعدات مەنٸزوروۆ الماتى وبلىسى ەكٸمٸنٸڭ ورىنباسارى قىزمەتٸنە بيىل 10 شٸلدەدە تاعايىندالعان. ودان بۇرىن الماتى قالالىق مەملەكەتتٸك سەۋلەت-قۇرىلىس باقىلاۋ باسقارماسىن ەكٸ جىل باسقاردى. 2008-2017 جىلدارى الماتى قالاسى الاتاۋ اۋدانىنىڭ ەكٸمٸ بولدى.
