Búgin QR Úkimetiniń otyrysynda Memleket basshysynyń jaqynda ótken Qaýipsizdik keńesiniń otyrysynda tarifter máselesi boiynsha bergen tapsyrmalaryn oryndaý maqsatynda qabyldanyp jatqan sharalar qaraldy. Premer-Ministr Baqytjan Saǵyntaev jumysty jalǵastyrý úshin birqatar naqty tapsyrmalar berdi.
Qaýipsizdik Keńesiniń otyrysynan keiin Úkimet birden tarifterdi tómendetý jáne jalpy, tarif jasaý júiesiniń ashyqtyǵyn qamtamasyz etý boiynsha sharalardy aiqyndady. Quramyna energetika, ulttyq ekonomika ministrlikteriniń, Bas prokýratýranyń ókilderi engen Jumys toby quryldy. Basty maqsaty — túpki tutynýshylar úshin tarifterdi tómendetý. Atap aitqanda, elektr energiiasyn óndirýdiń ózindik qunyn anyqtaý ádistemesi jasalyp jatyr. Tabiǵi monopolisterdiń qarajatynyń maqsatty paidalanylýyna memlekettik baqylaýdy kúsheitý jáne monopoliiaǵa qarsy qyzmetti kúsheitý boiynsha zańnamaǵa túzetýlerdi ázirleý bastaldy.
Energetika, ulttyq ekonomika ministrlikteriniń aldyna 1 jeltoqsanǵa qarai 2019 jyldyń 1 qańtarynan bastap tarifterdi tómendetýge múmkindik beretin júieli sharalardy ázirleý boiynsha mindetter qoiyldy. Otyrys barysynda birqatar mańyzdy máseleler atalyp ótildi. Birinshiden, tarifterdi qalyptastyrý úrdisiniń ashyqtyǵyn qamtamasyz etý, ekinshiden, energetika qyzmetteri naryǵyndaǵy baǵanyń qalyptasýyna memlekettik organdar tarapynan baqylaýdy kúsheitý. Tarifterdi tómendetý úshin barlyq qajetti sheshimderdi jyldam qabyldaý kerek.
Otyrysta energetika, ulttyq ekonomika ministrlikteriniń baiandamalary tyńdalyp, jumystary maquldandy.
Sonymen qatar Premer-Ministr 2019 jyldyń 1 qańtarynan bastap elektr energiiasy men jylýǵa ǵana emes, sý, gazben jabdyqtaý, káriz, telefon bailanysy jáne internet qyzmetterine tarifterdiń tómendeýi kerektigin atap ótti. Sonymen qatar PIK tarifterin qaita qaraý kerek. Bul jergilikti ákimderdiń quzyretinde. Bul oraida, tarifterdiń tómendeýi monopolisterdiń kórsetetin qyzmetteriniń sapasyn tómendetpeýi tiis, olardyń óndiristeri ýaqytyly jańǵyrtylyp otyrýy kerek. Qurylǵan Jumys toby osy baǵyttarda jumys isteýi tiis.
Zańnamalyq ózgerister turǵysynan tarif jobasyn usynǵan kezde jurtshylyq, sarapshylar bildirgen pikirlerdi, onyń ishinde, elektrondy túrde kelip túsetin pikirlerdi eskerý tapsyryldy. Keri bailanys ornaýy tiis. Ákimdikterdiń quzyryndaǵy óńirlerdegi tutyný normalary tarifterin bekitý de jariialanýy kerek.
Máseleni qaraý qortyndysy boiynsha Premer-Ministr birqatar naqty tapsyrmalar berdi.
Birinshi. Tabiǵi monopolisterdiń tariftik smetalar men investitsiialyq mindettemelerdi oryndamaý, qyzmet qunynan óndiristik emes shyǵyndaryn zańsyz qosý boiynsha anyqtalǵan barlyq faktilerge taldaý júrgizý qajet. Josyqsyz monopolister men tarifterdi kóterý arqyly paidaǵa kenelgen kompaniialar zań aldynda jaýap berýi tiis. Ony tergeý barysy jariialanýy kerek. Eki aptadan soń aǵymdaǵy jaǵdai týraly másele kezekti Úkimet otyrysynda qaralatyn bolady. Premer-Ministr quqyq qorǵaý organdarymen jáne prokýratýramen jumystardy úilestirýdi tapsyrdy.
Ulttyq ekonomika ministrligine eki aptadan soń biýdjetten sýbsidiia túrinde bólinetin qarajatty monopolisterdiń maqsatty jumsaýy týraly baiandaýy tapsyryldy. Halyqty TKSh qyzmetteriniń barlyq túrlerimen qamtamasyz etetin uiymdardyń mindettemelerin oryndaýyn baqylaý nátijeleri týraly esepter tyńdalatyn bolady.
Ekinshi. Ulttyq ekonomika ministrliginiń Monopoliiaǵa qarsy komitet pen onyń óńirlik bólimsheleriniń jumysyn retke keltirýge qatysty tásilderine qoldaý bildirildi. B. Saǵyntaev óz tarapynan tabiǵi monopoliialar salasyndaǵy saiasat pen monopoliiaǵa qarsy komitet jumysyna jetekshilik etetin ulttyq ekonomika vitse-ministri Serik Jumanǵarinniń jazalanǵanyn habarlady.
Úshinshi. 1 jeltoqsanǵa qarai ulttyq ekonomika, energetika ministrlikteri elektr, jylý, sý men gaz berý, káriz, telefon bailanysy, internet tarifteri qalai jáne qanshalyqty tómendeitini kórsetilgen jan-jaqty jospardy engizýi tiis.
Prezident «jumysty retke keltirip, áleýmettik jaýapkershilikti sezinip, ashyq bolyp, adamdardyń senimine laiyq bolý» mindetin qoidy. Osyǵan bailanysty energetika, ulttyq ekonomika ministrlikterine jeltoqsannyń alǵashqy onkúndiginde dóńgelek ústel ótkizip, bul is-sharalar josparyn óńirlik bólimshelerdiń, prokýratýra ókilderiniń, monopolisterdiń, depýtattardyń, úkimettik emes uiymdardyń, BAQ-tyń qatysýymen talqylaý tapsyryldy.
Baqytjan Saǵyntaev qoǵamnyń Úkimettiń tarifterdiń baǵasynyń jasalýynyń ashyqtyǵyn qamtamasyz etý jáne 2019 j. shekti tarifterdi qalyptastyrý máseleleri boiynsha tásilderin bilýi tiis ekenin atap ótti. Ulttyq ekonomika, energetika ministrlikteriniń basshylary, sonymen qatar óńirlik bólimshelerdiń basshylary jyl sońyna deiin halyq pen BAQ aldynda monopolisterdiń investitsiialyq mindettemelerin oryndaý tiimdiligi, tarifterdiń tómendeýi jáne halyqqa monopolister zańsyz iemdengen qarajattaryn qaitarý sharalary týraly kópshilik aldynda esep berýi tiis.
Tórtinshi. Ulttyq ekonomika ministrligine múddeli memlekettik organdarmen birlesip TKSh monitoringi respýblikalyq júiesin qurý tapsyryldy. Monitoring júiesi qoǵam ókilderiniń qatysýymen jergilikti jerlerde jumys istep, tariftermen, qyzmet sapasymen, halyqtyń suranysymen bailanysty barlyq máselelerdi kóterýi tiis.
Sonymen qatar QR UEM-ine osy aptanyń sońyna deiin TKSh tarifteri boiynsha jedel jeli ashý tapsyryldy. Qabyldanǵan sharalar týraly BAQ-qa habarlap turýy tiis.
Besinshi. Ulttyq ekonomika, energetika ministrlikterine jáne óńir ákimdikterine kómirdiń, gazdyń, dári-dármektiń jáne áleýmettik mańyzy bar taýarlardyń baǵasyn erekshe baqylaýǵa alý tapsyryldy. Birinshi kezekte, ákimder baǵanyń negizsiz ósýine jol bermei, kompaniialardyń «baǵany ózara kelisip alýynyń», aradaǵy deldaldardyń zańsyzdyqtaryn anyqtaýy kerek.
Altynshy. Bilim jáne ǵylym, densaýlyq saqtaý ministrlikterine osy salalarda halyqty alańdatyp otyrǵan ózekti máselelerdi sheshý boiynsha keńes ótkizý tapsyryldy. Negizgi aktsent — oqý qunyn, sondai-aq meditsinalyq qyzmetter men dári-dármektiń baǵasyn tómendetý. Oryndalý merzimi — eki apta.
Jetinshi. Aqparat jáne kommýnikatsiialar ministrligine barlyq baǵyttar boiynsha osy jumystardyń barlyǵyn aqparattyq súiemeldeýdi jolǵa qoiý tapsyryldy.
