Áleýmettik jelide azyq-túlik taýarlary baǵasynyń biryńǵai tizilimi bekitilgeni týraly jalǵan aqparat taraýda. Bul týraly QR Saýda jáne integratsiia ministrliginen málim etti, dep habarlaidy QazAqparat.
«Qazirgi ýaqytta áleýmettik jelilerde búkil Qazaqstan úshin 2022 jyldyń 1, 2, 3-toqsanyna arnalǵan áleýmettik mańyzy bar azyq-túlik taýarlaryna baǵalardyń shekti mánderiniń biryńǵai tizilimi týraly aqparat taratylýda. Aqparatta mynadai úndeýler bar: «Kez kelgen dúkenge kirińizder, baǵasy bir teńgege joǵary bolsa – ákimdikke qońyraý shalyńyz, dúkendi dereý jabady. Sanepidstantsiia, monopoliiaǵa qarsy, statistika kelip, dúkendi birden jabady. Satýshylardan osy baǵalardy talap etińiz«. Saýda jáne integratsiia ministrligi taratylǵan habarlama jalǵan ekenin habarlaidy!», - delingen vedomstvo aqparatynda.
Ministrlik málimetinshe, shekti baǵalardy árbir óńir úshin jergilikti atqarýshy organdar jeke belgileidi jáne olar eldiń basqa óńirlerinde qoldanylmaidy. Al aqparattyq habarlamada kórsetilgen baǵalardy Almaty oblysynyń ákimdigi óńir boiynsha áleýmettik mańyzy bar azyq-túlik taýarlaryna bólshek saýda baǵalarynyń shekti mánderiniń deńgeiin jariia talqylaý úshin ashyq kózderde ornalastyrǵan.
«Shekti mánder baǵalardyń aýytqýyn monitoringileý jáne baqylaý úshin bekitilgenin jáne áleýmettik mańyzy bar azyq-túlik taýarlarǵa naryqtyq baǵalardyń jai-kúiin baǵalaýdyń baǵdary retinde qyzmet etetinin atap ótken jón. Shekti mánnen asqan kezde shekti bólshek saýda baǵalary engiziledi. Olardy saqtamaý ákimshilik aiyppul salýǵa ákep soǵady. Qazaqstan turǵyndaryn tek resmi aqparat kózderine senýge shaqyramyz», - dep atap ótedi ministrlikten.
