Birikken Arab Ámirlikterinde qaza tapqan Qazaqstannyń eki azamaty – týǵan ápkeli-sińlili qyzdardyń denesi ótken demalys kúnderi elge jetkizilip, jer qoinyna tapsyryldy. Marqumdardyń ákesi qyzdarynyń naqty qalai qaitys bolǵanyn áli bilmeitinin aitty, dep habarlaidy ult.kz KTK telearnasyna silteme jasap.
Qyzdardyń denesin BAÁ politsiiasy ákesi týystyǵyn rastaý úshin DNQ saraptamasynan ótkennen keiin ǵana bergen. Alaida Meiram Bohanov qyzdarynyń denesin Qazaqstandaǵy jerleý rásimi qarsańynda ǵana kórgen.
«Betin meshitte ǵana ashtym. Aǵasy ekeýmiz qarap shyqtyq: ózimizdiń qyzdarymyz... Anasy kórgen joq. Olardy kóńildi, baqytty kúiinde este saqtasyn dedik», – dedi marqumdardyń ákesi.
Ákesi qyzdarynyń ólimine ne sebep bolǵany ata-anasyna áli naqty aitylmaǵanyn jetkizdi. Qujattarda ólim sebebi júrektiń toqtaýy dep kórsetilgen.
«Júregi toqtaǵan deidi. Olardyń naqty qalai qaitys bolǵanyn, qalai óltirilgenin bilmeimiz. Internette tarap jatqan aqparattyń bári – jalǵan! Senbeńizder! Saraptamanyń resmi qorytyndysy shyqqanda ǵana naqty aita alamyz», – dedi Meiram Bohanov.
Buǵan deiin qyzdardyń ólimine qatysty is boiynsha kúdikti ustalǵany habarlanǵan.
Eske salaiyq, 20 jáne 22 jastaǵy eki ápkeli-sińlili Qazaqstan azamaty byltyr jeltoqsanda jumys isteý úshin Shardjaǵa barǵan. Olar sulýlyq salonynda jumys istegen. Keiin qyzdar jaldamaly páterden óli kúiinde tabylǵan.
Olardyń denesinde zorlyq-zombylyq belgileriniń bolǵan-bolmaǵany jáne qaiǵyly jaǵdaidyń naqty qalai bolǵany ázirge belgisiz. BAÁ-degi tergeý nátijesi kútilip otyr.
Oqi otyryńyz: «Altyn belgimen» bitirgen: Shardjada qaza tapqan apaly-sińli týraly jańa derekter aityldy
Shardjada qaza tapqan apaly-sińlili qyzdardyń isine qatysty kúdiktiniń sýreti tarady
