Almatyda «B2B Jewelry» uiymdastyrýshylaryna qatysty tergeý jalǵasýda, dep habarlaidy "Ult aqparat" Qarjy monitoringi komitetine silteme jasap.
Komitettiń Almaty qalasy boiynsha ekonomikalyq tergeý departamenti Almaty prokýratýrasynyń úilestirýimen zergerlik dúkender jelisi atyn jamylyp, «B2B Jewelry» qarjy piramidasyn uiymdastyrǵandarǵa qatysty sotqa deiingi tergeýdi jalǵastyryp jatyr.
Qylmystyq istiń materialdaryna sáikes, uiymdastyrýshylar halyqqa satyp alý somasynyń 104% mólsherinde «keshbek» túrinde aqsha qaitarý kepildigimen zergerlik buiymdardy satqan.
Sonymen qatar, klientterge satyp alynǵan sertifikattyń quny men piramidaǵa tartylǵan adamdardyń sanyna bailanysty jylyna 520% kiriske deiin kepildik beretin «altyn» men «kúmiske» arnalǵan syilyq sertifikattar satylǵan.
ETD qyzmetkerleri júzege asyrǵan sharalardyń saldarynan qarjy piramidasynyń salymshylary salǵan 560 mln astam teńge, 303 myń AQSh dollary jáne 3 500 evro tárkilenip alyndy.
Qarjy piramidasy salymshylarynyń jalpy sany - Qazaqstannyń barlyq aimaqtaryn qosa eseptegende 10 000 astam adam.
Qazirgi ýaqytta sotqa deiingi tergeý aiasynda QR QK 217-babynyń 3-bólimi 2-tarmaǵyna sáikes jedel-tergeý is-sharalary júrgizilýde.
Kúdikti tulǵaǵa qatysty «qamaýda ustaý» bultartpaý sharasy qoldanyldy.
Osyǵan orai, qarjy monitoringi komiteti osy jobanyń qylmystyq áreketinen zardap shekken azamattardyń komitetke jáne Almaty qalasy boiynsha departamentke (Telefondary: 87786376213, 87028886449, 87017446040, 87074064945) júginýin ótinedi.
Basqa qala turǵyndary komitettiń aýmaqtyq ekonomikalyq tergeý departamentterine habarlasa alady.
Sondai-aq, Ýkrainanyń qaýipsizdik qyzmeti osyǵan uqsas is boiynsha B2B zergerlik piramidasynyń negizin qalaýshy Nikola Gontqa qatysty tergeý júrgizip jatyr.
