Úkimettiń búgingi otyrysynda azyq-túlik baǵasyn baqylaý máselesi qaraldy, dep xabarlaidy QazAqparat tilshisi.
QR Ulttyq ekonomika ministri Timýr Súleimenovtyń aitýynsha, áleýmettik mańyzy bar taýarlardyń baǵasy bir aptanyń ishinde 0,3 protsentke ósti. Sonyń ishinde qyryqqabat pen qanttyń shekti baǵasy barlyq aimaqtarda 15 protsentke kóterildi.
«Búginde baǵalardy ustap turatyn arnaiy komissiialar bar. Biraq jergilikti jerde atalǵan mexanizmdi tolyqqandy qoldanbaidy. Endi qant boiynsha obektivti sebepter bar. Álem naryǵynda qanttyń baǵasy ósip otyr. Al qyryqqabat boiynsha jaǵdai ózgeshe. Ony ákimdikter ózderi sheshe alady. Sondyqtan baǵanyń shekti mánderin belgilep, tiisti baqylaý sharalaryn júrgizý kerek. Alaida bir de bir ákimdik shekti mánderdi bekitken joq. Bul 2019 jyly birinshi toqsanda áleýmettik mańyzy bar azyq-túlik taýarlarynyń baǵasyna keri áserin tigizýi múmkin», - dedi T.Súleimenov.
Ministrdiń sózine qaraǵanda, komissiia sheshimderin qatań baqylap otyrý qajet. Budan bólek, ákimdikter jyl sońyna deiin 2019-dyń shekti mánderin bekitýi tiis. Kásipkerler arasynda túsindirý jumystaryn da júrgizgen jón.
QR Premer-Ministri Baqytjan Saǵyntaev ta azyq-túliktiń qymbattap ketkenin baiqap otyr.
«Negizinen, biz sońǵy bir ai boiy osy jóninde aityp kele jatyrmyz. Biraq qyryqqabat pen qantqa qatysty obektivti sebepter bar. Qalǵandardyń baǵasy negizsiz ósip otyr. Qorlarda qarjy bar, turaqtandyrý qorlarynda azyq-túlik jetkilikti. Bári bar bolsa, baǵa nege ósedi? Sebebi sizderdiń tarapyńyzdan baqylaý joq. Qazir qiiar men qyzanaqtyń baǵasy sharyqtap ketti. Oǵan qarap jatqan eshkim joq. Baqylaýǵa alyńyzdar!», - dedi B.Saǵyntaev.
