Almatyda ulttyq valiýtanyń qunsyzdanýyna bailanysty azyq-túlik baǵasynyń óskeni baiqalady. Bul týraly onlain-brifing kezinde qala ákiminiń orynbasary Saparbek Tuiaqbaev aitty, dep habarlaidy QazAqparat.
Onyń aitýynsha, ákimdik kún saiyn áleýmettik mańyzy bar azyq túlik baǵasyn baqylap otyr.
«Barlyq bazarlar men dúkender boiynsha táýligine eki ret jedel aqparat alynady. Azyq-túlik baǵasy sál kóterilgen. Onyń sebebi, teńgeniń qunsyzdanýy. Áleýmettik mańyzy joǵary azyq-túlik taýarlaryn qatań baqylaýda ustap otyrmyz. Turaqtandyrý qorynan 5 mlrd teńge bólindi. Osy baǵytta kelisimsharttar jasalatyn bolady. Dúisenbiden bastap iske qosamyz. Bizde ótken aptada 12 myń tonna kóleminde qor bar bolatyn. Ony qazir «Small» men «Magnum» dúkenderi arqyly belsendi satyp jatyrmyz. Atalmysh marketterdegi baǵa áli turaqty», - dedi ol.
Onyń aitýynsha, qazir qalada baǵany turaqtandyrý úshin iri jetkizýshilermen kelisim júrgizilip jatyr. Kelisimsharttar maýsym aiynyń aiaǵyna deiin belgilenbek.
Sonymen qatar, megapoliste meiramhanalar men dámhanalardyń, sondai-aq onlain-dúkenderdiń jumysy kúsheitilgen. Sonymen qatar qalaǵa azyq-túlik tasymaldaityn júk kólikterine «jasyl dáliz» uiymdastyryldy.
«Búginde qalaǵa syrttan keletin nemese syrtqa shyǵatyn azyq-túlik tasymaldaýshy kólikter men logistikalyq qyzmet túrlerine «jasyl dáliz» qamtamasyz etildi. Almatyda áleýmettik mańyzdy 19 túrli taýardyń túri bar. Azyq-túlikten tapshylyq bolmaidy. Olar tiisti kólemde jetkiziledi», – dedi S. Tuiaqbaev.
