Ortalyq kommýnikatsiialar qyzmetindegi brifingide QR Eńbek jáne halyqty áleýmettik qorǵaý ministri Birjan Nurymbetov tótenshe jaǵdai rejimi kezinde azyq-túlik jiyntyǵy kimderge beriletindigin túsindirdi, dep habarlaidy QazAqparat.
«Biýdjet qarajaty esebinen azyq-túlik sebeti bastapqyda 460 myń adamǵa berilgen edi. Degenmen, 31 naýryzda Prezident ony keńeitýdi tapsyrdy jáne respýblikalyq biýdjetti sońǵy naqtylaý barysynda qosymsha qarajat qarastyryldy. Qazirgi ýaqytta barlyq óńirde azyq-túlik jiyntyǵy nemese azyq-túlik jiyntyǵyna arnalǵan qarajat berilip jatyr», - dedi ol.
Ministrdiń dereginshe, azyq-túlik jiyntyǵy 1,243 mln adamǵa qarastyrylǵan.
«Olar myna sanattar: Kóp balaly otbasylardy, barlyq toptaǵy jáne bastaǵy múgedekterdi qosa alǵanda ataýly áleýmettik kómek alatyn az qamtylǵan azamattary múgedek balanyń kútimimen otyrǵan ata-analar, sonymen qatar jumyspen qamtý organdarynda jumyssyz retinde resmi tirkelgen tulǵalar», - dedi Birjan Nurymbetov.
Munan bólek, onyń aitýynsha, túrli qorlar men eriktiler de halyqtyń az qamtylǵan toptaryn azyq-túlikpen qamtýǵa kómektesip jatyr.
«Biz birgemiz» qory, elimizdiń patriottary bar. Olar da azyq-túlik jiyntyǵymen qamtamasyz etip jatyr. Bizden áleýmettik jaǵynan az qamtylǵan azamattardyń tizimin alyp, olarǵa kómek kórsetip jatqan uiymdar da óte kóp», - dedi ministr.
